महिला भलिबल खेलाडीलाई पोशाक वितरण
२२ फागुन, दमक । स्व मुगाधन कृष्ण कुमारी राई स्मृति प्रतिष्ठानले आज प्रदेश नं १ का महिला भलिबल खेलाडीलाई खेल पोशाक वितरण गरेको छ ।
प्रजातन्त्रका सेनानी स्वर्गीय राईको १६आँै स्मृति दिवसको अवसर पारेर सो सामग्री वितरण गरिएको प्रतिष्ठानकी अध्यक्ष समेत रहनुभएकी प्रतिनिधिसभा सदस्य महेन्द्रकुमारी लिम्बूले बताउनुभयो ।
ती पोशाक प्रतिष्ठानका सदस्यसमेत रहेका बेलायत बस्दै आउनुभएका बक्सिङ खेलाडी रवीन राईले प्रायोजन गर्नुभएको थियो । पोशाक हस्तान्तरणमा स्व राईका परिवारका तर्फबाट बुहारी सवनम राई, छोरा रञ्जन राई, नाति विजय सुब्बालगायत खेलप्रेमीको उपस्थिति रहेको थियो ।
राईद्वारा जन्मदिनमा असहाय तथा विपन्नलाई सहयोग
नेपाली कांग्रेस १ नं प्रदेश सदस्य तथा झापा, कमल–५ मङुगलबारे निवासी हुकुमसिंह राईले आफनो जन्मोत्सवको अवसर पारेर असहाय ,विपन्न समुदायलाई रु एक लाख बराबरको सहयोग उपलव्ध गराउनुभएको छ ।
जन्मदिनलाई सेवासँग जोडिएर वर्सेनि परोपकारी कार्य गरिआएका राईले आज कमल–७ को सिद्धश्वर गुरुकुल शिक्षा मन्दिरका बटुकलाई चप्पलसहित खाद्यान्न र सोही वडाको पाथीभरा टोल निवासी मिर्गौला रोगी ५० वर्षीय मनोज लकान्द्रीलाई रु १५ हजार आर्थिक सहयोग गर्नुभएको छ ।
यसैगरि उहाँले कमल–४ को जोगीचौनमा बस्दैआएका त्यहाँका २६ विपन्न परिवारलाई चामल एक बोरा, दाल, तेल, नून उपलब्ध गराउनुभयो । सहायता सामग्री हस्तान्तरण कार्यक्रममा बोल्दै समाजसेवी राईले जन्मदिनलाई स्वेच्छिक रुपमा यसरी नै सेवा पु¥याउँदै आएको बताउनुभयो ।