इरानसँगको युद्धमा अमेरिकाको खर्च २९ अर्ब डलर, हतियारको भण्डार र पारदर्शितामाथि प्रश्न

३१ बैशाख, काठमाडौँ । अमेरिकी रक्षा मन्त्रालय पेन्टागनले इरानसँगको युद्ध र सैन्य तयारीको कुल लागत करिब २९ अर्ब अमेरिकी डलर पुगेको जानकारी दिएको छ। क्यापिटल हिलमा आयोजित बजेट सुनुवाइका क्रममा सार्वजनिक गरिएको यो तथ्याङ्क रक्षा सचिव पिट हेगसेथले दुई हप्ताअघि गरेको अनुमानभन्दा चार अर्ब डलरले बढी हो।

पेन्टागनका वित्त प्रमुख जुल्स हस्र्ट तृतीयले सांसदहरूलाई दिएको जानकारी अनुसार उपकरणको मर्मत, प्रतिस्थापन र व्यापक परिचालन खर्चका कारण लागत २९ अर्बको हाराहारीमा पुगेको हो। यो विवरण सन् २०२७ का लागि १.५ ट्रिलियन डलरको बजेट अनुरोधमा बहस भइरहेका बेला बाहिर आएको हो। रक्षा सचिव हेगसेथले प्रशासनले पेन्टागनको मुख्य बजेटभन्दा छुट्टै पूरक बजेट अनुरोध गर्ने बताए पनि त्यसको समय भने खुलाएका छैनन्।

अमेरिकी राष्ट्रपति डोनाल्ड ट्रम्पले तेहरानको पछिल्लो शान्ति प्रस्ताव अस्वीकार गरेपछि विपक्षी डेमोक्र्याटहरूले प्रशासनको कडा आलोचना गरेका छन्। हाउस एप्रोप्रिएशन कमिटीकी शीर्ष डेमोक्र्याट रोजा डेलाउरोले “कुन लागतमा के हासिल भयो?” भन्दै प्रश्न गरेकी छिन्। त्यस्तै, बेट्टी म्याककोलमले पेन्टागनमा पारदर्शिताको अभाव रहेको र दीर्घकालीन रणनीति स्पष्ट नभई थप कोष अनुमोदन गर्न नसकिने अडान राखेकी छिन्।

महिनौँदेखिको क्षेप्यास्त्र र हवाई प्रतिरक्षा अभियानका कारण अमेरिकी हतियारको भण्डार घट्दै गएकोमा चिन्ता व्यक्त गरिएको छ। सिनेटर मार्क केलीले टोमाहक मिसाइल र प्याट्रियट इन्टरसेप्टर जस्ता उन्नत प्रणालीको भण्डार गम्भीर रूपमा घटेको र यसलाई पुनःपूर्ति गर्न वर्षौँ लाग्न सक्ने चेतावनी दिएका छन्। यसले भविष्यमा चीनसँग हुन सक्ने सम्भावित टकरावमा अमेरिकी तत्परता कमजोर बनाउन सक्ने उनको तर्क छ। यद्यपि, रक्षा सचिव हेगसेथले भने हतियार अभावको कुरालाई ‘बढाइचढाइ गरिएको’ भन्दै अस्वीकार गरेका छन्।

ह्वाइट हाउसले फेब्रुअरी २८ मा इरानविरुद्ध सुरु भएको शत्रुता ‘समाप्त भएको’ औपचारिक जानकारी काङ्ग्रेसलाई दिएको छ। तर, विपक्षीहरूले भने राष्ट्रपति ट्रम्पले काङ्ग्रेसको उचित अनुमति बिना नै युद्ध सञ्चालन गरेको आरोप लगाउँदै आएका छन्। यस विषयमा थप स्पष्टताका लागि सिनेट समितिले रक्षा अधिकारीहरूसँग दोस्रो चरणको सोधपुछ जारी राखेको छ।