Advertisement
०९ असाेज, काठमाडाैं । चालु आर्थिक वर्षको दुई महिनाको अवधिमा नेपालको व्यापार घाटा झण्डै साढे २ खर्ब पुगेको छ । सरकारले आयातमा कडाई गर्दा अघिल्लो आर्थिक वर्षको तुलनामा आयत घटेपनि निर्यातमा समेत गिरावट आएको छ ।
चालु आवको साउन र भदौ महिनामा सरकारले ३ खर्ब २ अर्ब २८ करोडको वैदेशिक व्यापार गरेको छ । जुन अघिल्लो आवको यसै अवधिको भन्दा १५.७० प्रतिशत कम हो । गत आवको पहिलो दुई महिनामा ३ खर्ब ५८ अर्ब ५५ करोड बराबरको वैदेशिक व्यापार गरेको छ ।
साउन र भदौको दुई महिना अवधिमा नेपालको व्यापार घाटा २ खर्ब ४४ अर्ब ९१ करोड नाघेकोे छ । जुन गत आवको यसै अवधिको भन्दा ९।४५ प्रतिशतले कम हो । गत वर्षको सोही अवधिमा नेपालले २ खर्ब ७० अर्ब ४७ करोड व्यापारघाटा व्यहोरेको थियो ।
चालु आर्थिक वर्षको दुई महिनाको अवधिमा नेपालले २ खर्ब ७३ अर्ब ५९ करोड ९६ लाख ५२ हजार रुपैयाँको वस्तु आयात गरेको भन्सार विभागको तथ्याङ्क छ । जुन अघिल्लो वर्षको यसै अवधिको तुलनामा १३ प्रतिशत कम हो । गत वर्षको सोही अवधिमा नेपालले ३ खर्ब १४ अर्ब ५१ करोड ७१ लाख रुपैयाँको आयात गरेको थियो।
दशैं नजिकिँदै गर्दा साउनको तुलनामा भने भदौमा आयात बढेको भन्सार विभागले जनाएको छ । गत साउनमा १ खर्ब ३१ अर्ब २८ करोड रुपैयाँको आयात भएकोमा भदौमा १ खर्ब ४२ अर्ब ३१ करोडको आयात भएको विभागले जनाएको छ ।
भन्सार विभागका अनुसार पछिल्लो दुई महिनामा नेपालले २८ अर्ब ६८ करोडको वस्तु निर्यात गरेको छ । जुन गत आवको यसै अवधिको भन्दा ३४।८८ प्रतिशत कम हो । गत आवको पहिलो दुई महिनामा ४४ अर्ब बराबरकोे वस्तु निर्यात गरेको थियो।
साउन र भदौमा सबैभन्दा बढी डिजेल आयात गरेको छ । दुई महिनाको अवधिमा १८ अर्ब ४२ करोड १५ लाख रुपैयाँको डिजेल, १२ अर्ब १८ करोड ९४ लाख रुपैयाँको पेट्रोल, १० अर्ब ४२ करोड ३ लाख रुपैयाँको एलपीजी ग्यास आयत भएको छ ।
त्यस्तै साउन र भदौमा ९ अर्ब ८ करोड ५४ लाख रुपैयाँको कच्चा भटमासको तेल, ७ अर्ब २७ करोड ८४ लाख रुपैयाँको फेरस प्रोडक्ट, ६ अर्ब ६१ करोड ७० लाख रुपैयाँको कच्चा पाम तेल, ६ अर्ब १८ करोड ९ लाख रुपैयाँको मोबाइलफोन, ६ अर्ब १८ करोड १ लाख रुपैयाँको आइरन तथा स्टिल र ४ अर्ब ९१ करोड ९१ लाख रुपैयाँको डण्डी आयात गरेको छ ।
नेपालले सो अवधिमा २ अर्ब ४७ करोड ४९ लाख रुपैयाँको पामोलिन तेल निर्यात गरेको छ । त्यस्तै, २ अर्ब १३ करोड ५५ लाख रुपैयाँको कार्पेट, १ अर्ब ९६ करोड ८६ लाख रुपैयाँको भटमासको तेल, ३ अर्ब २२ करोड ५ लाख रुपैयाँको पाम तेल १ अर्ब २० करोड ६६ लाख रुपैयाँको फेल्ट, ९० करोड ६९ लाख रुपैयाँको चिया, ७४ करोड ७७ लाख रुपैयाँको चिया, ६८ करोड २६ लाख रुपैयाँको धागो र ६८ करोड ९ लाख रुपैयाँको अलैंची निर्यात गरेको छ ।
Comments
