Advertisement
१३ भदाै, बनेपा । अविरल वर्षासँगै राजमार्गमाथिबाट खसेको ढुङ्गा लागेर एक जनाको मृत्यु भएको छ । अविरल वर्षासँगै आइतबार बिहान बीपी राजमार्ग अन्तर्गत रोशी गाउँपालिका–७ कटुञ्जेमा राजमार्गमाथिबाट खसेको ढुङ्गाले लाग्दा महोत्तरी जिल्ला रामगोपालपुर घर भएका २८ वर्षीय सरोजकुमार साहको मृत्यु भएको हो ।
जिल्ला प्रहरी कार्यालय काभ्रेका प्रहरी नायब उपरीक्षक हरि खतिवडाले आइतबार बिहान ९ बजे राजमार्गमाथिबाट खसेको ढुङ्गाले लाग्दा जनकपुरबाट काठमाडौँतर्फ आउँदै गरेको ज. ८ प ७४९० नम्बरको मोटरसाइकलका चालक साह र मोटरसाइकल पछाडि सवार धनुषा रामानन्धचोकका ३० वर्षीय सतिसकुमार साह घाइते भएको बताउनुभयो । घाइते दुवैलाई उपचारका लागि धुलिखेल पठाइएकोमा मोटरसाइकल चालक सरोजकुमारलाई अस्पतालले बिहान १०ः३० बजे मृत्यु घोषणा गरेको उहाँले बताउनुभयो । अर्का घाइते सतिसकुमार साहको पेट र अनुहारमा चोट लागेकोले धुलिखेल अस्पतालमा उपचार भइरहेको प्रहरीले जनाएको छ ।
अविरल वर्षाका कारण अरनिको राजमार्गको खावादेखि तीन पिप्लेसम्मको सडक खण्डको विभिन्न स्थानमा पहिरो गई केही समय राजमार्ग अवरुद्ध भएको छ । सडक विभागले अरनिको राजमार्गको खावादेखि तीन पिप्लेसम्मको सडकमा मोड सुधारको काम गरिरहेकोले पहिरो गएको हो । पहिरो गएर अवरुद्ध भएको अरनिको राजमार्गको पहिरो पन्छाउनका लागि प्रहरी परिचालन गरी यातायात सुचारु गरिएको जिल्ला प्रहरी कार्यालय काभ्रेले जनाएको छ ।
वर्षाका कारण बिपी राजमार्गको विभिन्न स्थानमा साना साना पहिरो र ठाउँ ठाउँमा राजमार्गमाथिबाट ढुङ्गा खस्ने क्रम बढेको प्रहरीले जनाएको छ । अविरल वर्षाका कारण जिल्लाका साना तथा ठुला नदी तथा खोलाहरुमा पानीको सतह बढेको छ । वर्षाका कारण हुन सक्ने क्षति न्यूनीकरण गर्नका लागि ठूलो सङ्ख्यामा प्रहरी परिचालन गरिएको प्रहरी नायव उपरीक्षक खतिवडाले बताउनुभयो ।
Comments
