Advertisement
०९ फागुन, काठमाडाैँ । बाँकेका राप्रपा नेताहरु पुर्नगठित राष्ट्रिय प्रजातन्त्र पाटी नेपालको केन्द्रीय सदस्य पदमा समेटिएका छन्। राप्रपाको महाधिवेशन पश्चात निवर्तमान अध्यक्ष एवम् पूर्व उपप्रधानमन्त्री कमल थापाले राप्रपा पार्टी परित्याग गरेपछि थापा समर्थक नेताहरुले समेत पार्टी परित्याग गरेका थिए।
राप्रपा नेपाललाई पुर्नगठन गर्दै थापाको अध्यक्षतामा घोषणा गरिएको राप्रपा नेपाल पाटीको केन्द्रीय समितिलाई पूर्णता दिनेक्रममा बाँकेबाट हिक्मत ढकाल, खेमराज गौतम, टोपेन्द्र बहादुर शाहि, श्रीधर सुवेदी, मो.खालिद ईराकी, आशा धिमाल, लक्ष्मी हमाल केन्द्रीय सदस्यमा मनोनित भएका राप्रपा नेपालले जनाएको छ।
यस्तै बाँकेबाट राप्रपाको राजनीति शुरु गरेका नेता पुरु दाहाल पनि कैलाली जिल्लाबाट केन्द्रीय सदस्यमा समेटिएका छन् । राप्रपा नेपालको केन्द्रीय सदस्यमा समेटिएका ढकाल राप्रपाको केन्द्रीय पदाधिकारी रहिसकेकानेता हुन् भने सुवेदी राप्रपा बाँकेका प्रवक्ताको जिम्मेवारी पूरा गरिसकेका नेता हुन्।
बाँकेबाट केन्द्रीय सदस्यमा समेटिएका धिमाल र हमाल पनि यस क्षेत्रमा राजनीतिक सम्भावन उच्च रहेका राजनीतिक कार्यकर्ताको रुपमा हेरिने गरिएको छ।
केन्द्रीय सदस्यले पूर्णता पाएसँगै पदाधिकारी पनि टुङ्गिने राप्रपा नेता सुवेदीले बताए।
केन्द्रीय सदस्य सुवेदीका अनुसार राप्रपा नेपालको अध्यक्ष थापाको अध्यक्षतामा सम्पन्न पहिलो बैठकले पार्टीको घोषणापत्र र विधान मस्यौदालाई परिमार्जन सहित पारित गर्दै घोषणापत्रमा सनातन वैदिक मूल्य, मान्यता र चिन्तनमा आधारित “सम्बर्धनवाद” पार्टीको बैचारिक दर्शन हुनेछ।
बैठकले गत पन्ध्र वर्षको अभ्यास र अनुभवलाई दृष्टिगत गर्दै धर्मनिरपेक्षता विनाशर्त खारेज गरिनुपर्ने र संघीयताको वर्तमान स्वरुप र संरचनालाई परिवर्तन गर्नुपर्ने माग सहित ८ वटा विषयमा निर्णय समेत गरेको छ। बैठकबाट निर्णय भए अनुसार स्थानीय निकायको निर्वाचनको तयारीको लागि गठित स्थानीय निकाय निर्वाचन परिचालन समितिमा बाँकेबाट खेमराज गौतम पनि सदस्यमा समेटिएको राप्रपा नेपालका नेता सुवेदीले जानकारी दिए।
Comments
