Advertisement
२२ पुस, काठमाडौं । नारायणहिटी संग्रहालयल अवलोकन गर्ने आउनेले अब स्वर्गीय राजा वीरेन्द्रले शुभ–राज्यभिषेकमा प्रयोग गर्नुभएको बग्गी हेर्न पाउने भएका छन् । नेपाली सेनाको क्याबलरी गुल्ममा रहेको सो बग्गी मर्मत गरी संग्रहालय प्रशासनले मंगलबारदेखि प्रदर्शनीमा राखेको छ ।
नेपाली सेनाले उक्त बग्गी संग्रहालय प्रशासनलाई हस्तान्तरण गरेपछि मर्मत गरी अवलोकनका लागि संग्रहालय परिसरमा राखिएको हो । बेलायती महारानी एलिजाबेथ द्वितीयाले नेपालको पूर्वराजपरिवारलाई उपहार दिएको बग्गीको संग्रहालयमा संस्कृति, पर्यटन तथा नागरिक
उड्डयन मन्त्रालयका सचिव यादवप्रसाद कोइरालाले उद्घाटन गर्नुभएको हो । प्रदर्शनी उद्घाटन गर्दै सचिव कोइरालाले नेपालको शाहकालीन इतिहास बोकेको सबै सम्पत्ति प्रदर्शनीमा राख्ने तयारी भइरहेको जानकारी दिँदै भन्नुभयो– ‘अन्य ऐतिहासिक सामग्री पनि प्रदर्शनीमा राख्ने तयारी भइरहेको छ ।’
नारायणहिटी दरबार संग्रहालय तथा गणतन्त्र स्मारक व्यवस्थापन तथा सञ्चालन विकास समितिका कार्यकारी निर्देशक भेषनारायण दाहालले राजा वीरेन्द्र र त्यसअघिका शाहकालीन राजाले प्रयोग गर्ने सामग्री प्रदर्शनीमा राख्ने क्रममा बग्गी राखिएको जानकारी गराउनुभयो ।
उहाँले स्वर्गीय राजा वीरेन्द्रले विसं. २०३१ मा सोही बग्गीमा सवार भएर राज्यभिषेक गर्नुभएको बताउँदै शाहकालीन राजपरिवारले प्रयोग गरेको अन्य सामग्रीहरू पनि चरणबद्ध रुपमा प्रदर्शनीमा राखिने जानकारी गराउनुभयो । विसं. २०६५ फागुन १५ देखि नारायणहिटी दरबार संग्रहालयका रूपमा सर्वसाधारणका निम्ति पनि खुला गरिएको थियो ।
नारायणहिटी हत्याकाण्डमा मृत्यु भएका राजा वीरेन्द्र, युवराज दीपेन्द्र, अधिराजकुमारी श्रुति र अधिराजकुमार निराजनले बच्चामा प्रयोग गरेका सवारीसाधन प्रदर्शनीमा राखिसकेको छ ।
संग्रहालय विकास समितिले स्वर्गीय रानी ऐश्वर्याको शृंगार कक्ष नजिक फोटोग्राफी कक्ष राख्ने तयारी गरेको छ । संग्रहालयले स्वर्गीय राजा वीरेन्द्र र त्यस अघिका शाहकालीन राजा र उहाँका परिवारका फोटो सो शाखामा राख्न लागिएको हो । नारायणहिटी दरबारमा रहेका सबै फोटो खोजी गरिसकेका जानकारी दिँदै संग्रहालय प्रमुख दाहालले भन्नुभयो– ‘केही फोटो विभिन्न क्षेत्रबाट खोजी गरेर फोटोग्राफी कक्षमा राख्नेछौं ।’
त्यस्तै, राजा वीरेन्द्र र उहाँको परिवारको डकुमेन्ट्री तयार गर्ने र ती सामग्री दरबारको हल खुलेलगत्तै देखाउने तयारी पनि संग्रहालयले गरेको छ । यसका लागि संग्रहालयले नारायणहिटी दरबारभित्र रहेको हल मर्मत गरिसकेको छ भने डकुमेन्ट्री तयार गर्न टुके मेसिन र सर्भर पनि खरिद गरिसकेको छ ।
त्यस्तै, राजा त्रिभुवन र महेन्द्रले प्रयोग गर्ने पुरानो सवारीसाधन मर्मत गरी प्रदर्शनीमा राख्ने तयारी पनि भइरहेको संग्रहालयले जनाएको छ । पुरानो भइसकेका सबै सवारीसाधन सकेसम्म चल्न सक्नेगरी मर्मत गरेर प्रदर्शनीमा राख्ने तयारी भइरहेको संग्रहालय प्रमुख दाहालले बताउनुभयो ।
Comments
