Advertisement
१२ पुष, काठमाडाैं । वर्तमान सत्ता समिकरण निर्माणमा मुख्य भूमिका निभाएका नेकपा (माओवादी केन्द्र)का नेता वर्षमान पुन यसपटक सरकारमा नजाने मुडमा पुगेका छन् ।
सोमबारसम्म उपप्रधान सहित गृह मन्त्रीको दाबी गरिरहेकामा सो स्थानमा राष्ट्रिय स्वतन्त्र पार्टीका सभापति रवि लामिछाने र अर्कातिर दलको वरिष्ठ नेता नारायणकाजी श्रेष्ठ उप्रधानमन्त्री तथा भौतिक पूर्वाधार तथा यातायात मन्त्रीमा नियुक्त भएपछि पुन व्याक हुने अवस्थामा पुगेका हुन् ।
पुन निकटस्थ स्रोतका अनुसार आफ्नो स्वास्थ्य अवस्था पनि कमजोर रहेकाले यसपाली सरकारमा नजाने र केहि आराम गर्ने पुनले बताउन थालेका छन् । जटिलखालको जण्डिसका कारण उनी गत सातामात्रै चीनमा पुनः उपचार गरेर नेपाल फर्किएका थिए । फर्किएलगत्तै उनले नेकपा एमालेका उपाध्यक्ष विष्णु पौडेल लगायतका एमाले नेतृत्वसँग सरकार गठनका विकल्पमा छलफल सुरु गरेका थिए।
आफू सत्ता बाहिर रहे पनि विगतमा आफु र आफ्नो दलले सँहाल्दै आएको ऊर्जा जलश्रोत तथा सिँचाई मन्त्रालयमा माओवादीले नै पाउनु उपयुक्त हुने सुझाव प्रधानमन्त्री पुष्पकमल दाहाल प्रचण्डलाई दिएका छन् ।
पुन सरकारमा नजाने भएपछि अव नयाँ अनुहारलाई मन्त्रीमण्डलमा ल्याउने मुडमा पनि दाहाल रहेको स्रोतले बताएको छ । उता नेता कृष्णबहादुर महराले भने प्रत्यक्ष निर्वाचनमा सम्मानजनक जीत हासिल गरेकी एक मात्र महिला रहेकी रेखा शर्मालाई सरकारमा पठाउनु पर्ने प्रस्ताव गरेका छन् ।
विगतमा संघीय मामिला तथा सामान्य प्रसासन मन्त्रालयको नेतृत्व गरिसकेकी शर्मालाई सरकारमा पठाउँदा महिला सहभागिता र वरिष्ठता समेत मिल्ने भएकाले महराले उनलाई सरकारमा पठाउनु पर्ने तर्क पार्टीभित्र गरिरहेका छन् । शर्मालाई ऊर्जा मन्त्रालय दिन उपयुक्त हुने उनको मत रहेको बुझिएको छ । यद्यपी उद्योग वाणिज्य तथा आपूर्ति मन्त्रालय पनि उनका लागि विकल्प हुने उनको धारणा रहको बुझिएको छ ।
मुलुकले प्रगति हासिल गरिरहेको ऊर्जा क्षेत्र माओवादीकै नेतृत्वमा रहँदा प्रगति भइरहेकाले पनि त्यसको निरन्तरताका लागि ऊर्जा मन्त्रालय छाड्न नहुने मत पार्टीमा बलियो रहेको छ ।
२०६२/०६३ को आन्दोलन पश्चात अधिकाँश समय ऊर्जा मन्त्रालय नेकपा माओवादीले नै संहाल्दै आएको छ । पोष्टबहादुर बोगटी, जनार्दन शर्मा, वर्षमान पुन र पम्फा भुषालले विभिन्न समयमा यो मन्त्रालय संहाल्दै आएका हुन् ।
तर सरकारमा सहभागी मुख्य दल नेकपा एमालेमा भने ऊर्जा मन्त्रीमा टोपबहादुर रायमाझीलाई पठाउने चर्चा चलिरहेको छ ।एमाले भित्र अर्को सम्भावित पात्र गोकर्ण विष्ट पनि हुन् ।
आठ सदस्यीय मन्त्रीपरिष्द गठन भइसकेपछि नेकपा एमाले अध्यक्ष केपि शर्मा ओली र माओवादी अध्यक्ष दाहाल भने अव सरकारले संसदमा विश्वासको मत लिइसकेपछि मात्र मन्त्रिमण्डल विस्तार गर्ने तयारीमा रहेको बताइएको छ।
Comments
