बाराही हाइड्रोपावरको आईपीओ मंसिर २१ गतेदेखि
१३मंसिर, काठमाडाैं । बाराही हाइड्रोपावरले मंसिर २१ गतेदेखि सर्वसाधारणमा प्रारम्भिक सार्वजनिक निष्कासन (आईपीओ) जारी गर्ने भएको छ ।
कम्पनीले ५ करोड ५४ लाख रुपैयाँ बराबरको ५ लाख ५४ हजार कित्ता सेयर बिक्री खुला गर्नेछ । सर्वसाधारणका लागि छुट्टाइउको ४ लाख ५० हजार कित्ता र आयोजना प्रभावित क्षेत्रका बासिन्दाहरुका लागि जारी गरेको २ लाख ५० हजार कित्तामध्ये अवितरित १ लाख ४ हजार कित्ता समेत थपेर सर्वसाधारणमा खुला गरिन लागिएको हो ।
कुल ५ लाख ५४ हजार कित्तामध्ये ५ प्रतिशत अर्थात् २७ हजार कित्ता सामुहिक लगानी कोष योजना र २ प्रतिशत अर्थात् ११ हजार ८० कित्ता सेयर कर्मचारीहरुका लागि छुट्याइएको छ । बाँकी ५ लाख १५ हजार २२० कित्ताका लागि आम सर्वसाधारणले आवेदन दिन सक्नेछन् ।
मंसिर २१ गतेदेखि खुला हुने सेयर चार दिन (मंसिर २६ गते) सम्म खुला रहनेछ । लगानीकर्ताले मेरो सेयर मोबाइल एप, वेवसाइट, तथा नेपाल धितोपत्र बोर्डबाट सि–आस्वा अनुमति प्राप्त बैंक तथा वित्तीय संस्था र तिनका शाखा कार्यालयहरुबाट आईपीओमा आवेदन दिन सक्नेछन् ।
न्यूनतम १० कित्तादेखि अधिकतम १० हजार कित्तासम्म माग गर्न सकिएपनि उच्च् आवेदनका कारण एक हजारको आवेदन नै यस आईपीओमा प्रयाप्त हुनेछ ।
क्रेडिट रेटिङ एजेन्सी इक्रा नेपालले बाराहीको आईपीओलाई औसत भन्दा कम आधार जनाउने ‘इक्रा एनपी आइआर डबल बी माइनस’ रेटिङ दिएको छ । कम्पनीले सेयर बिक्री गर्न एनआईबिएल एस क्यापिटललाई धितोपत्र निष्कासन तथा बिक्री प्रबन्धक नियुक्त गरेको छ ।