गरिमा विकास बैंकको लाभांश घट्यो, कति बाँड्दैछ बोनस ?
२५ कात्तिक, काठमाडाैं । गरिमा विकास बैंक लिमिटेड (GBBL) ले आर्थिक वर्ष २०७८/७९ को सञ्चित नाफाबाट सेयरधनीलाई कुल ६६ करोड ५६ लाख ७६ हजार ६५७ रुपैयाँ लाभांश वितरण गर्ने भएको छ ।
बैंक सञ्चालक समितिको बिहीबार बसेको बैठकले गत आवको नाफाबाट १३ प्रतिशत (५९ करोड ६८ लाख १३ हजार ५५५ रुपैयाँ) बराबरको बोनस सेयर र कर तिर्न १.५० प्रतिशत नगद (६ करोड ८८ लाख ६३ हजार १०२ रुपैयाँ) लाभांश वितरण गर्ने प्रस्ताव गरेको हो ।
अघिल्लो आवमा १६ प्रतिशत बोनस सेयर वितरण गरेको बैंकले १.५० प्रतिशत कम लाभांश वितरणको प्रस्ताव गरेको हो ।
सञ्चालक समितिको बैठकले प्रस्ताव गरेको उक्त लाभांश नियामक निकाय राष्ट्र बैंक र बैंकको आगामी वार्षिक साधारण सभाले अनुमोदन गरेपछि लगानीकर्तालाई वितरण हुनेछ ।