सानिमा बैंकको ५१ लाख कित्ता संस्थापक सेयर बिक्रीमा
०८ असाेज, काठमाडाैं । सानिमा बैंकले ५१ लाख कित्ता संस्थापक सेयर बिक्री खुला गरेको छ ।
बैंकका केही संस्थापक सेयरधनीले आफ्नो स्वामित्वमा रहेको सेयर बिक्री गर्न बैंकमा निवेदन दिएसपछि बैंकले शुक्रबार ५१ लाख कित्ता सेयर बिक्रीको सूचना ल्याएको हो ।
हाल सानिमा बैंककाे संस्थापक सेयरधनीले मानत्र उक्त सेयरमा आवेदन दिन सक्नेछन् । सेयरमा न्यूनतम १४५ रुपैयाँलाई आधार प्रतिस्पर्धी मूल्यमा आवेदन दिन सक्नेछन् । न्यूनतम १० लाख कित्तादेखि अधिकतम सबै संस्थापक सेयर खरिदका लागि आवेदन दिन सकिनेछ ।
सेयर खरिद गर्न इच्छुक संस्थापकले आज असोज ७ गतेदेखि ३५ दिनभित्र सानिमा बैंकको प्रधान कार्यालय नारायणचौर नक्साल काठमाडौंमा निवेदन दिनुपर्ने बैंकले जनाएको छ । यस अवधिमा कुनै पनि संस्थापकबाट आवेदन नपरेमा दोस्रा चरणमा आम सर्वसाधारण लगानीकर्तालाई सो सेयर बिक्री खुला गरिने बैंकले जनाएको छ ।
समीट लघुवित्तको २२ हजार कित्ता संस्थापक सेयर बिक्रीमा
यसैगरी समीट लघुवित्तले पनि२२ हजार २१५ कित्ता संस्थापक सेयर बिक्रीमा ल्याएको छ ।
लघुवित्तले विद्यमान संस्थापक सेयरधनीले आवेदन दिन सक्नेगरी सो सयर बिक्री खुला गरेको हो । असोज ७ गतेदेखि ३५ दिनभित्र संस्थाको केन्द्रीय कार्यालय बनेपा–१०, काभ्रेपलाञ्चोकमा सेयर मूल्य र संख्या खुलाई निवेदन पेश गर्नुपर्ने लघुवित्तले जनाएको छ ।
विद्यमान संस्थापक सेयरधनीहरुबाट उक्त समयभित्र कुनैपनि निवेदन प्राप्त नभए अन्य व्यक्ति वा संस्थालाई सेयर बिक्री गर्ने लघुवित्त कम्पनीले जनाएको छ ।