क्षमतै नहेरी बैङ्कहरूले मनपरी कर्जा विस्तार गर्दा लगानीयोग्य रकम अभाव : नेपाल राष्ट्र बैङ्क
Advertisement
११ साउन, काठमाडौँ । नेपाल राष्ट्र बैङ्कले बैङ्कहरूले कर्जा विस्तारमा मनपरी गर्दा अहिले लगानीयोग्य रकम अभाव भएको निष्कर्ष निकालेको छ ।
केन्द्रीय बैङ्कले बैङ्क सुपरभिजन रिपोर्ट सार्वजनिक गर्दै बैङ्कहरूको ऋण विस्तारको आक्रामक शैलीमाथि प्रश्न गरेको हो ।
जुन उद्देश्यका लागि ऋण दिइएको थियो, त्यसमा प्रयोग नभएको केन्द्रीय बैङ्कले औँल्याएको छ ।
कोभिड १९ महामारीका बेला बैङ्कहरूबाट प्रवाह भएको कर्जा तोकिएको क्षेत्रमा प्रयोग नभएर अन्य ऋण तथा साँवा-ब्याज भुक्तानीमा प्रयोग भएको राष्ट्र बैङ्कको प्रतिवेदन उल्लेख छ ।
ऋण तिर्न सक्ने क्षमतासमेत नहेरी बैङ्कहरूले ऋण दिएका छन् । कर्जा विस्तारले उत्पादनभन्दा अनावश्यक वस्तुको आयात र उपभोगमा बढी खर्च भएको राष्ट्र बैङ्कको ठहर छ ।
दिगो अर्थतन्त्र निर्माण अहिलेको आवश्यकता भएकाले वित्तीय प्रणाली सन्तुलित बनाउनुपर्ने भएको छ ।
केन्द्रीय बैङ्कले कोभिड १९ को प्रभाव न्यूनीकरण गर्न त्यतिवेला बैङ्क तथा वित्तीय संस्थामार्फत विभिन्न खालका सहुलियत दिएको थियो ।
केन्द्रीय बैङ्कले चालु आर्थिक वर्षको मौद्रिक नीतिमार्फत कुल गार्हस्थ्य उत्पादनभन्दा कर्जा विस्तारको आकार ठुलो भएको भन्दै त्यसलाई साइजमा ल्याउन कर्जा विस्तारको लक्ष्य घटाएको छ ।
चालु आर्थिक वर्ष १२.५ प्रतिशतसम्म कर्जा विस्तार हुने मौद्रिक नीतिमा उल्लेख छ ।
कर्जा विस्तार कम गर्न विभिन्न खालका नीतिगत दरहरुमा वृद्धि गरिएको छ । पछिल्लो तथ्यांकअनुसार अहिले कुल निक्षेप ५० खर्बभन्दा बढी छ । कर्जा ४६ खर्बभन्दा बढी छ ।
Comments
