ङातापोल्हँ मन्दिरकाे ३२० वर्ष पूरा : फहराइयो पतचाः, मनाइयो बुसादाँ
१६ असार, भक्तपुर । विश्व प्रसिद्ध ङातापोल्हँ (पाँचतले) मन्दिरकाे ३२० वर्ष पूरा भएको अवसरमा आज (बिहीवार) पतचाः (झण्डा तोलन) फहराएर बुसादाँ मनाइएको छ । प्रत्येक वर्ष असार शुक्लपक्ष प्रतिपदाको दिन (निर्माण् सम्मन्न भएको दिन) ङातापोल्हँको बुसादाँ मनाइँदै आइएको छ ।
बुसादाँ मनाइनुअघि मन्दिर भित्र पतचाःलाई कर्माचार्य, जोशी, राजोपाध्य र ताल्चाभडेल पुजारीहरुले विधिवत् रुपमा पुजा गरी बोका बली दिने प्रचलन रहेको छ । पुजापछि पतचाःलाई भक्तपुर तुछिमलाका अवाल समुदायलाई हस्तान्तरण गरिन्छ ।
मन्दिरमा पतचाः फहराउनका लागि तुछिमलाको अवालबाहेक अरुलाई मन्दिरमाथि प्रवेश गर्न निषेध रहेको छ । प्रत्येक वर्षझैँ यो वर्ष पनि करिव एक दर्जन अवालहरु मन्दिरमाथि गएर पतचाः फहराएका छन् । पतचाः राख्नका लागि ४ जनाले गजुरको चार कुनामा बसेर बाँधेका थिए । करिव १ हजार ५,२० फिट लामो पाटसहितको बाँसमा ६६ इन्च लम्बाई र ४४ इन्च चौडाईको सेतो कपडाले पतचाः फहराइएको थियो ।
नेपाल सम्वत ८२२ मा राजा भुपतेन्द्र मल्लले असार शुक्लपक्ष प्रतिपदाको दिन पहिलो वर्षको बुसादाँ पुजा सुरु गरी पतचाः फहराएको इतिहासमा उल्लेख छ ।