विमान चढ्नलाई खोप कार्ड देखाउनै पर्ने
०६ माघ, काठमाडाैँ । कोरोना महामारीको जोखिम बढेपछि आन्तरिक उडानका यात्रुलाई समेत खोप कार्ड अनिवार्य गरिएको छ । वायुसेवा सञ्चालक संघले महामारीको तेस्रो लहरले तहल्का मचाएपछि खोप कार्ड अनिवार्य गर्ने निर्णय गरेको हो । खोप कार्डको सट्टा मोबाइलमा कार्डको फोटो देखाए पनि हुने जनाइएको छ ।
साथै, सबै विमानभित्र सेनिटाइजरको व्यवस्था गर्नुपर्ने, प्रत्येक उडानपछि हवाई जहाज र ब्यागेज निःसंक्रमित गर्नुपर्ने, चेक–इन, बोर्डिङ, ब्यागेज क्लेम गर्ने स्थान तथा प्रतीक्षालयमा भीडभाड हुन नदिने र स्वास्थ्यका मापदण्ड लागू गर्न संघले निर्देशन दिएको छ ।
छोटो दुरीमा यात्रा गर्नेहरुले भने एन्टिजेन परीक्षण गर्नुनपर्ने भएको छ । यसअघि आन्तरिक हवाई यात्रामा अनिवार्य एन्टिजेन परीक्षण गर्नुपर्ने र त्यो पनि सम्बन्धित एयरलाइन्सकै खर्चमा हुनुपर्ने भनिएको थियो ।
तर, छोटो दुरीको हवाई यात्रामा उक्त व्यवस्था अव्यवहारिक हुने भन्दै निजी वायु सेवा सञ्चालकहरूले विरोध गरेपछि उक्त निर्णय तत्कालको लागि लागु नहुने जनाइएको छ ।