सडक अवरुद्ध हुँदा समस्या
२३ भदाै, पर्वत । धौलागिरि क्षेत्रका चार जिल्ला भित्रने मुख्य सडक विगत छ दिनदेखि अवरुद्ध छ । सडक अवरुद्ध हुँदा चार जिल्लामा भित्रने सबैजसो सामग्री बीचबाटोमै अलपत्र परेका छन् । सडक अवरुद्ध भएसँगै पर्वतसहितका धौलागिरि क्षेत्रका चार जिल्लाको स्वास्थ्य क्षेत्रमा समस्या देखिने भएको छ ।
कोभिड–१९ रोगको उपचारका लागि अत्यावश्यक मानिएको अक्सिजन ल्याउन अस्पतालमा समस्या परेको छ । पर्वत अस्पतालका अनुसार बाँकी अक्सिजन रित्तिदै जाने र अक्सिजन ल्याउन समस्या परेको छ । मुख्य सडक अवरुद्ध भएसँगै अक्सिनजको अभाव हुन नदिन अस्पतालले वैकल्पिक सडक प्रयोग गरेको छ ।
पर्वतको कुश्मादेखि भ्याप्लेसम्मको सडक खुले पनि भ्याप्ले खण्डमा ठूलो पहिरो गएका कारण सवारी आगमन अवरुद्ध छ । अक्सिजन पोखराबाट पर्वतमा आउँछ । अक्सिजनका सिलिण्डर कोभिड बिरामीको उपचार गर्दा रित्तिदै गएपछि कार्किनेटा–नौडाँडा सडक प्रयोग गरेर अक्सिजन ल्याउने तयारी भएको पर्वत अस्पताल विकास समितिका अध्यक्ष गोविन्द पहाडीले जानकारी दिनुभयो ।
कोभिड–१९ रोगको उपचार गरिरहेको अस्पतालमा अहिले पनि कोभिड रोगका बिरामी उपचाररत छन् । पर्वतबाहेक म्याग्दी बागलुङमा पनि कोभिड रोगको उपचाररत बिरामी छन् । उनीहरुको उपचारका लागि पोखराबाट ल्याइने गरिएको अक्सिजन सडक अवरुद्ध हुँदा आउन सकेको छैन । अक्सिजन प्लान्टबाट हुने उत्पादनमात्र पर्याप्त नहुने हुँदा अक्सिजन सिलिण्डर ल्याउनुपर्ने अवस्था रहेको पहाडीले बताउनुभयो ।
अस्पतालले वैकल्पिक विधिमार्फत अक्सिजनको आपूर्ति गर्ने गरी तयारी गरे पनि यता सडक भने अझै केही समय नखुल्ने देखिएको छ । भ्याप्लेको पहिरो हटाउनका लागि बम विस्फोट गरिए पनि विस्फोट प्रभावकारी नभएको सुरक्षा प्रहरीले जनाएको छ । थप विस्फोटमार्फत पहिरो हटाउने गरी काम भइरहेको मध्यपहाडी लोकमार्ग आयोजना कार्यालय पर्वतले जनाएको छ ।