Advertisement
१० साउन, काठमाडौं । काठमाडौं उपत्यकामा जारी निषेधाज्ञालाई निरन्तरता दिइने भएको छ । पछिल्लो समय निषेधाज्ञामा केही खुकुलो बनाएसगैँ संक्रमितको संख्यामा बृृद्धि हुन थालेको छ ।
संक्रमितको संख्यामा बृद्धि भएसगैँ केही समय निषेधाज्ञालाई निरन्तरता दिने तयारी भएको काठमाडौं जिल्लाका प्रमुख जिल्ला अधिकारी कालीप्रसाद पराजुलीले जानकारी दिए ।
उनले निषेधाज्ञा पुरै नहट्ने बताउँदै सार्वजनिक सवारीसाधन खुलेपनि उपत्यकाभित्र रात्रि क्लब, पार्टी प्यालेस, होटेल, रेष्टुरेण्टमा कडाइ हुनसक्ने बताए ।
‘अहिले नै रात्रि व्यवसाय खुलाउन सक्ने अवस्था छैन, फिल्म हल र जीमखानाबारे आज छलफल गरेर निर्णय गर्छौ’, उनले भने ।
निषेधाज्ञाको मोडालिटीको विषयमा निर्णय गर्न आईतबार चार बजे तीनवटै जिल्लाका प्रमुख जिल्ला अधिकारीको संयुक्त बैठक बस्दैछ । उनका अनुसार आजको बैठकमा निषेधाज्ञा थप गर्नेदेखि थप खुला गर्ने क्षेत्रको विषयमा छलफल हुनेछ ।
हाल विभिन्न क्षेत्रका व्यवसाय सञ्चालन गर्न समय तोकिएको छ । पछिल्लोपटक थप गरिएको निषेधाज्ञा आइतबार राति १२ बजे सकिँदै छ । दोस्रो लहरको कोरोना महामारीलाई ध्यानमा राख्दै गत बैशाख १६ गतेदेखि तीन जिल्लामा निषेधाज्ञा लागु गरिएको थियो।
Comments
