Advertisement
०५ माघ, बलेवा । ग्रामीण पर्यटनका पिता भनेर चिनिने स्व क्याप्टेन रुद्रमान गुरुङको स्मृतिमा बागलुङमा निर्माणाधीन उद्यानका लागि बजेट अभाव भएपछि सहयोग जुटाउन अभियान थालिएको छ । बागलुङ नगरपालिका–१० भकुण्डेस्थित अतिथि सत्कार घरबासले उद्यान निर्माणको काम थालेको हो ।
उद्यान निर्माणको जिम्मेवारी पाएको उपभोक्ता समिति र घरबासले संरचना निर्माणका लागि रकम अभाव भएकाले सहयोग अभियान थालेका हुन् । भकुण्डे भ्यूटावर परिसरमा उद्यान निर्माणको काम थालिएको अतिथि सत्कार समुदायिक घरबासका अध्यक्ष खिमबहादुर थापाले बताउनुभयो । गुरुङको शालिकसहितको उद्यान निर्माण हुनेछ । एक सय मिटर लम्बाइ र ४० मिटर चौडाइ क्षेत्रफलमा उद्यान बनाउन थालिएको छ ।
“गुरुङको स्मृतिमा उद्यान बनाउनु हामी पर्यटन व्यवसायीको दायित्व हो”, उहाँले भन्नुभयो, “घरबासकै पहल र सक्रियतामा उद्यान बन्दैछ ।” गण्डकी प्रदेश सरकारले घरबासका लागि उपलब्ध गराएको रु १० लाख अनुदान सहयोगबाट उद्यानको काम थालिएको हो । झण्डै रु पाँच करोड ५० लाखको विस्तृत परियोजना प्रतिवेदन रहेको उद्यानका लागि रु १० लाखमात्रै अनुदान मिलेको छ ।
बाँकी रकम जुटाउन उपभोक्ता समिति, स्थानीयवासी र घरबास सञ्चालकले दाताको साथ खोजिरहेका छन् । अभियानको सुरुआत भएसँगै देश–विदेशमा रहेका भकुण्डेवासीले सहयोग गर्न थालेका छन् । अभियानलाई प्रभावकारी बनाउँदै प्रारम्भिक चरणका काम सम्पन्न गर्ने लक्ष्य रहेको थापाले बताउनुभयो ।
अघिल्लो वर्ष उद्यान निर्माणस्थलमा तारबार र संरचना निर्माणको काम थालिएको उपभोक्ता समितिले जनाएको छ । “उद्यानमा फूलबारी र अन्य संरचना पनि बन्छन्”, थापा भन्नुहुन्छ, “पर्यटकीय गाउँ भकुण्डे आउने पर्यटकका लागि अर्को सुन्दर गन्तव्य बनाउँदैछौँ ।” उद्यानमा पर्यटनसँग सम्बन्धित खोज र अनुसान्धानका सामग्री रहने पुस्तकालयसमेत निर्माण गर्ने योजना घरबासले बनाएको छ । “यहाँ आउने जो–कोहीले ग्रामीण पर्यटनका पिताको विषयमा जानकारी पाउन भन्ने हो”, थापाले भन्नुभयो, “ग्रामीण पर्यटनको विषयमा अध्ययन गर्न चाहनेहरूका लागि व्यवस्था मिलाउँछौँ ।”
घरबास सञ्चालक र उपभोक्ता समितिले गण्डकी प्रदेशका उद्योग पर्यटन वन तथा वातावरणमन्त्रीलाई ल्याएर उद्यान निर्माणको शिलान्यास गराएका थिए । “प्रदेश सरकारले घरबासलाई दिएको रकम दुरुपयोग भनेर अनुगमन थालेको छ”, घरबास सञ्चालक चन्द्रवीर थापाले भन्नुभयो ।
अष्ट्रेलियन नागरिक टमी पार्क र भूतपूर्व गोरखा सेनाका अवकाशप्राप्त लाहुरे गुरुङको प्रयासमा २०५४ असोजदेखि स्याङ्जाको सिरुबारी पहिलो ग्रामीण पर्यटनगाउँका रुपमा चिनिएको थियो । गाउँ पर्यटन प्रवद्र्धन मञ्च (भिटोफ) पोखराले पनि यसअघि ‘गुरुङ स्मृति पुरस्कार’ गाउँ पर्यटनको प्रवद्र्धनमा कलम चलाउने पत्रकारलाई प्रदान गर्ने गरी स्थापना गरेको थियो ।
मल्टिमिडिया ग्यालरी
Comments
