Advertisement
६ वैशाख, काठमाडौं । झण्डै एउटा स्टुडियो अपार्टमेन्ट जति आकारको यो विश्वकै सबैभन्दा ठूलो यात्रुबाहक एलेभेटर (लिफ्ट)को वजन १६ टन छ । नौ वटा स्टिल केबलले धानेको यो लिफ्टले एक पटकमा २ सय ३५ जना मानिस बोक्नसक्छ।
फिनल्याण्डको एलेभेटर कम्पनी कोनेले दुई वर्षअघि नै भारतको मुम्बइस्थित जियो वर्ल्ड सेन्टरको भवनमा संसारकै ठूलो यो एलेभेटर जडान गरेको थियो ।
उक्त बहुप्रतिष्ठित सम्मेलन केन्द्रमा विभिन्न समारोह तथा मेलाहरुमा सहभागी हुने ठूलो संख्याका मानिसहरुलाई बोक्नका लागि उक्त लिफ्टको डिजाइन गरिएको हो ।
२५.७८ वर्गमिटरको उक्त लिफ्टमा यात्रा गरिरहँदा उक्त भवन परिसरको ठूलो आकारमा दृश्य तथा सुन्दर बगैँचा समेत देख्न पाइन्छ ।
यो एलेभेटर पुली बिम प्रणालीमा आधारित छ, जसमा १८ वटा ठूलो आकारका पुली, ९ वटा स्टिल केबल रहेका छन् ।
विश्वकै ठूलो यो यात्रुबाहक लिफ्टमा चार प्यानल भएको काँचको ढोका, बाहिरको सुन्दर दृश्य देखिने काँचकै भित्ता र क्रिस्टल जडित सिलिंग रहेको छ । भवनको पाँचौँ तलासम्म मात्रै पुग्ने यो लिफ्टको गति १ मिटर प्रतिसेकेण्ड रहेको छ । यसभित्र यात्रुहरु बस्नका लागि दुईवटा आरामदायी सोफा पनि राखिएको छ।
कोने कम्पनीले यो भिमकाय लिफ्टको मूल्य हालसम्म पनि सार्वजनिक गरेको छैन ।
एजेन्सीको सहयोगमा
Comments
