Advertisement
१४ चैत, सुर्खेत । बिहीबारदेखि सञ्चालन हुने माध्यमिक शिक्षा परीक्षा (एसईई) मा कर्णाली प्रदेशबाट सहभागी हुने विद्यार्थीको संख्या अघिल्लो वर्षको तुलनामा घटेको छ ।
यो वर्ष कर्णालीबाट ३५ हजार ८०८ जना विद्यार्थी एसईई परीक्षामा सहभागी हुने भएका छन् । गत वर्ष ३८ हजार ९७० जना विद्यार्थीले एसईई दिएका थिए । गत वर्षको तुलनामा यो वर्ष ३ हजार १६२ विद्यार्थी कम भएका छन् ।
प्रदेश शिक्षा विकास निर्देशनालय कर्णालीका अनुसार यो वर्ष एसईईमा सहभागी हुने परीक्षार्थीमध्ये १७ हजार ६२३ छात्र र १८ हजार १५८ छात्रा छन् । परीक्षाका लागि प्रदेशभर १८६ वटा परीक्षा केन्द्र निर्धारण गरिएको छ ।
जिल्लागत विवरणअनुसार सबैभन्दा धेरै सुर्खेतबाट ८ हजार ३४८ विद्यार्थीले एसईई दिँदैछन् । सुर्खेतमा ३३ वटा परीक्षा केन्द्र तोकिएको छ । रुकुम पश्चिममा २३ वटा परीक्षा केन्द्र तोकिएको छ भने ३ हजार ५९३ परीक्षार्थी छन् । ४ हजार ५८२ परीक्षार्थी रहेको सल्यानमा २५ वटा परीक्षा केन्द्र तोकिएको छ ।
हिमाली जिल्लामा विद्यार्थीको संख्या न्यून रहेको छ । सबैभन्दा कम डोल्पामा ७३३ विद्यार्थीले एसईई दिंदैछन् । डोल्पामा ४ वटामात्रै परीक्षा केन्द्र तोकिएको छ ।
जाजरकोटमा २२ परीक्षा केन्द्रमा ४ हजार ६९४ परीक्षार्थी, दैलेखमा २५ परीक्षा केन्द्रमा ५ हजार २५७ परीक्षार्थीले एसईई दिंदैछन् । हुम्लाका ६ वटा परीक्षा केन्द्रबाट १ हजार १९५ जना विद्यार्थीले परीक्षा दिने भएका छन् । मुगुमा ८ वटा परीक्षा केन्द्र र १ हजार ११३ परीक्षार्थी छन् ।
२४ वटा परीक्षा केन्द्र रहेको कालीकोटमा ३ हजार ७३६ परीक्षार्थी छन् । जुम्लामा २ हजार ५५७ परीक्षार्थीका लागि १६ परीक्षा केन्द्र तोकिएको छ । शिक्षा विकास निर्देशनालयका निमित्त निर्देशक दीपा हमालले कर्णालीमा एसईई परीक्षाको सम्पूर्ण तयारी पूरा भइसकेको जानकारी दिएकी छन् ।
मल्टिमिडिया ग्यालरी
Comments
