Advertisement
०३ फागुन, काठमाडौं । नेपालमा सामसङ फोनको राष्ट्रिय वितरक ‘आईएमएस’ र नेपाली बजारमा स्थानीय रूपमा नवीकरण गरिएका मोबाइल फोनहरू तयार गर्ने अग्रणी कम्पनी ‘सबको फोन’ बीच सम्झौता भएको छ ।
विभिन्न ब्रान्डका मोबाइल प्रयोगकर्ताहरुलाई आफूले प्रयोग गरेको फोन साटी सामसङ स्मार्टफोनमा अपग्रेड गर्न सजिलो विकल्प प्रदान गर्ने उद्देश्यले यो मोबाइल एक्सचेन्ज सुविधासम्बन्धी सम्झौता गरिएको जनाइएको छ ।
यो एक्सचेन्ज सुविधा अन्तर्गत ग्राहकले आफूले प्रयोग गरेका जुनसुकै ब्राण्डका मोबाइललाई नयाँ सामसङ स्मार्टफोनसँग साट्न सक्नेछन् ।
आईएमएस सबको फोन एक्सचेन्ज सुविधा अन्तर्गत प्रदान गरिने वेबमा आधारित प्रणालीको प्रयोग गरी ग्राहकले आफूले प्रयोग गरिको फोनको विवरण भरि, १ मिनेटमा फोनको मूल्य प्राप्त गरि नयाँ सामसङ स्मार्टफोनमा सजिलै अपग्रेड गर्न सक्नेछन् ।
यस्तो एक्सचेन्ज सुविधा प्राप्त गर्नका लागि ग्राहकले आफूले प्रयोग गरेको मोबाइलको भ्याट बिल र परिचय खुल्ने सरकारी परिचयपत्र अनिवार्य उपलब्ध गराई स्वघोषणा फारम भर्नुपर्नेछ ।
प्रथम चरणका लागि यो सुविधा हाल सामसङको आधिकारिक आईएमएस स्मार्ट आउटलेटहरू र काठमाडौंमा रहेका अधिकृत बिक्रेतामा मात्र उपलब्ध गराइएको छ ।
सबको फोनका संस्थापक उत्तम काफ्लेले यस सहकार्यप्रति उत्साह व्यक्त गर्दै आईएमएस र सबको फोन बीचको यस साझेदारीले मोबाइल प्रयोगकर्ताहरुलाई मोबाइल एक्सचेन्ज गर्न सहज र छिटो बनाउनुका साथै उचित मूल्य प्रदान गर्ने लक्ष्य रहेको बताए ।
‘एक पटक प्रयोग गरिएका फोनहरूलाई अपसाइकल गरी पुनः प्रयोग गर्न सके विद्युतीय फोहोरको समस्याहरूलाई समेत सम्बोधन गर्न सकिन्छ । हामीले सुरु गरेको यस प्रयासले नेपालमा वातावरण र पुनः प्रयोगप्रति जिम्मेवार र सामाजिक उत्तरदायी उद्यमशीलताको प्रतिनिधित्व गर्नेछ,’ उनले भने ।
आईएमएस ग्रुपका अध्यक्ष एवम् प्रमुख कार्यकारी अधिकृत दिकेश मलहोत्राले सबको फोनसँगको सहकार्यले नेपालमा मोबाइल एक्सचेन्जलाई सहज बनाउने विश्वास व्यक्त गरे ।
यो सुविधाको कार्यान्वयन पहिलो चरणमा काठमाडौंका आउटलेटहरूमा केन्द्रित हुने र विस्तारै एक्सचेन्ज सुविधा नेपालभरि उपलब्ध गराउने योजना रहेको उनले बताए ।
Comments
