दश महिनामा पौने ३३ अर्बको निर्जीवन बीमा व्यवसाय, कसको कति ?
२१ जेठ, काठमाडाैं । निर्जिवन बीमा कम्पनीहरुले चालु आर्थिक वर्षको दश महिनामा पौने ३३ अर्ब रुपैयाँ बराबरको व्यवसाय गरेका छन् ।
बीमा प्राधिकरणको तथ्याङ्क अनुसार २०८० बैशाख मसान्तसम्ममा सञ्चालनमा रहेका १५ निर्जीवन बीमा कम्पनीहरुले कुल ३२ अर्ब ६८ करोड ९६ लाख ११ हजार रुपैयाँ कुल बीमा शुल्क संकलन गरेका हुन् । यस अवधिमा बीमा कम्पनीहरुले २३ लाख ५० हजार ६५२ वटा बीमालेख जारी गरेका छन् ।
निर्जीवन बीमा कम्पनीहरुमध्ये शीर्ष स्थानमा रहेको शिखर इन्स्योरेन्सले ४ अर्ब ४२ करोड ६९ लाख ५३ हजार रुपैयाँ कुल बीमा शुल्क संकलन गरेको छ । यस्तै सगरमाथा र लुम्बिनी इन्स्योरेन्स मर्जर पश्चात बनेको सलिकोले ३ अर्ब ७३ करोड ७ लाख ७८ हजार रुपैयाँ, सिद्धार्थ र प्रिमियम इन्स्योरेन्सबीच मर्जरपश्चात बनेको सिद्धार्थ प्रिमियम इन्स्योरेन्सले ३ अर्ब ६४ करोड ९६ लाख ७ हजार रुपैयाँ, हिमालयन एभरेष्ट इन्स्योरेन्सले २ अर्ब ४९ करोड ४ लाख ३६ हजार रुपैयाँ र पाँचौं स्थानमा रहेको नेको इन्स्योरेन्सले २ अर्ब ४५ करोड ९३ लाख ४८ हजार रुपैयाँ कुल बीमाशुल्क संकलन गरेको प्राधिकरणको तथ्याङ्क छ ।
सरकारी स्वामित्वको राष्ट्रिय बीमा कम्पनीले २ अर्ब २ करोड ५१ लाख ५४ हजार रुपैयाँ कुल बीमाशुल्क संकलन गरेको छ । बाँकी ९ वटा निर्जीवन बीमा कम्पनीहरुले बैशाख मसान्तसम्म संकलन गरेको बीमाशुल्क दुई अर्ब रुपैयाँभन्दा कम छ । सबैभन्दा कम बीमाशुल्क भारतीय लगानी रहेको नेशनल इन्स्योरेन्स कम्पनीले ८२ करोड ४२ लाख १७ हजार रुपैयाँ बीमाशुल्क संकलन गरेको छ ।