Advertisement
२७ चैत, एजेन्सी । रुस र युक्रेनबीच विगत १४ महिनादेखि चलिरहेको युद्धसँग सम्बन्धित केही गोप्य अमेरिकी कागजात इन्टरनेटमा लिक भएका छन् । यी कागजातहरूमा युद्धसँग सम्बन्धित फोटो, नक्सा र चार्टहरू समावेश छन् ।
यी कागजातहरू सामाजिक सञ्जालमा भाइरल भइरहेका छन् । यी कागजातहरू मध्ये केही ६ हप्ता पुराना पनि छन् ।
पेन्टागनका अधिकारीहरूलाई उद्धृत गर्दै यी कागजातहरू वास्तविक रहेको बताइएको छ । बीबीसीले तीमध्ये २० वटा दस्ताबेज हेरेको जानकारी दिएको छ ।
यसमा युक्रेनलाई दिइएको हतियार र तालिम आदिको विस्तृत जानकारी समावेश छ । साथै, ब्रिगेडहरू कहिले तयार हुनेछन् भन्ने कुरा पनि समावेश छ ।
यी ब्रिगेडहरूमा समावेश भएका ट्याङ्क, बख्तरबंद गाडी र गोला बारुद युक्रेनलाई पश्चिमी सहयोगीहरूले उपलब्ध गराउँदै आएका छन् ।
यससँगै दुवैतर्फको जनधनको क्षतिको जानकारी पनि यी कागजातमा समावेश गरिएको छ ।
कसले जारी गर्यो र दस्ताबेज कसरी बाहिरिए
ओपन सोर्स इन्टेलिजेन्स ग्रुप बेलिङकेटसँग सम्बन्धित एरिक टोलरका अनुसार यी दस्ताबेज मेसेजिङ प्लेटफर्म डिस्कर्ड र 4chan मा देखिएको छ ।
टोलरका अनुसार यो लिकको वास्तविक स्रोत के हो भन्ने अहिलेसम्म पनि पत्ता लाग्न सकेको छैन ।
मार्च ४ मा, कम्प्युटर गेम माइनक्राफ्टसँग सम्बन्धित सर्भरमा केही गेमरहरूबीच चर्को बहस चलिरहेको थियो, यसै बीचमा, एक प्रयोगकर्ताले युद्धसँग सम्बन्धित दस कागजातहरू साझा गरे ।
यो एकदमै दुर्लभ छ तर यसअघि पनि कागजपत्र लिक भएका घटनाहरू बाहिर आएका छन् ।
सन् २०१९ मा, बेलायती आमचुनाव अघि, अमेरिका–ब्रिटेनबीच व्यापारिक सम्बन्धसँग जोडिएका दस्ताबेज रेडिट, 4chanसमेत अन्य वेबसाइटमा देखिएका थिए ।
Comments
