Advertisement
२८ फागुन, काठमाडाैं । आत्मनिर्भर लघुवित्त वित्तीय संस्थाको प्रारम्भिक सार्वजनिक निष्कासन (आईपीओ) बाँडफाँड भएको छ । धितोपत्र निष्कासन तथा बाँडफाँड निर्देशिका २०७४ बमोजिम बिक्री प्रबन्धक सनराइज क्यापिटलको कार्यालयमा आज बिहान सेयर बाँडफाँड भएको हो ।
बाँडफाँडमा १६ हजार ९७६ जनाले सेयर हात पारेका छन् । उच्च आवेदनका कारण गोलाप्रथाबाट १६ हजार ९७६ जनालाई १० कित्ताका दरले १ लाख ६९ हजार ७६० कित्ता सेयर बाँडफाँड गरिएको हो । यसरी बाँडफाँड गरी बाँकी रहेको ५ कित्ता सेयर गोलाप्रथाबाट सेयर पाउने (१६ हजार ९७६ जना) मध्येबाट पुनः पाँच जनालाई थप १।१ कित्ता बाँडफाँड गरिएको हो । यसअनुसार ५ जनाले ११ कित्ताका दरले ५५ कित्ता र १६ हजार ९७१ जनाले १० कित्ताका दरले १ लाख ६९ हजार ७१० कित्ता सेयर हात पारेका हुन् ।
दुई हजार २०३ आवेदन रद्द
लघुवित्तको आईपीओ खरिदका लागि आवेदन दिएकामध्ये २ हजार २०३ जनाको आवेदन रद्द भएको बिक्री प्रबन्धकले जनाएको छ ।
आईपीओ खरिदका लागि कुल १५ लाख ३८ हजार ४६६ वटा आवेदन परेकोमा १५ लाख ३६ हजार २६३ वटा आवेदन मात्र बाँडफाँडका लागि योग्य सदर भएको थियो । सदर आवेदकको १.१० प्रतिशतले मात्र सेयर हात पारेका छन् ।
आईपीओ खरिदका लागि माग संख्याको तुलनामा ९९.०४ गुणा बढी माग परेको हो । कर्मचारी, सामुहिक लगानी कोष र वैदेशिक रोजगारीमा रहेका नेपालीहरुका लागि छुट्टाएर कम्पनीले सर्वाधारणबाट १ लाख ६९ हजार ७६५ कित्ताका लागि दरखास्त माग गरेको थियो । आईपीओ खरिदका लागि १ करोड ६८ लाख १३ लाख १८० कित्ताको लागि आवेदन परेको हो । जसमध्ये २७ हजार १५० कित्ताके आवेदन रद्द भई १ करोड ६७ लाख ८६ लाख ३० कित्ताको माग सदर भएको थियो ।
कम्पनीले फागुन ११ गतेदेखि फागुन १५ गतेसम्म सेयर बिक्री खुला गरेको थियो । कम्पनीले कर्मचारीहरुको लागि ३ हजार ११७ कित्ता, सामुहिक लगानी कोषहरुलाई लागि १० हजार १७० कित्तासेयर पनि बाँडफाँड गरेको छ । कुल २ लाख ३ हजार ३८० कित्ता सेयर सार्वजनिक निष्कासन गरेको कम्पनीले सोभन्दा अघि नै वैदेशिक रोजगारीमा रहेका नेपालीहरुका लागि २० हजार ३३८ कित्ता सेयर निष्कासन गरि बाँडफाँड गरेको छ ।
बाँकी १ लाख ६९ हजार ७५५ कित्ता सेयरको लागि आम सर्वसाधारणको लागि निष्कासन गरेको थियो । वैदेशिक रोजगारीमा रहेका नेपालीहरुका लागि बाँडफाँड भएको कित्तामध्ये १० कित्ता सेयर वैदेशिक रोजगारीमा नगएका व्यक्ति परेपछि १० कित्ता सेयर आम सर्वसाधारणतर्फ थप गरी बाँडफाँड गरिएको हो ।
Comments
