Advertisement
१९ पुस, काठमाडाैं । वैकल्पिक ऊर्जा प्रबर्द्धन केन्द्रले अहिले २ हजार ८ सय थान इन्डक्सन चुलो निशुल्क वितरण गरिरहेको छ भने थप ५५ सय थान पनि बाँड्ने भएको छ ।
दुर्गम जिल्लाबाट काठमाडौँमा अध्ययनका लागि बसोबास गरेका विद्यार्थीलाई निशुल्क विद्युतीय चुलो वितरण थालेको छ । गत असार मसान्त भित्रै वितरण सक्ने गरी केन्द्रले गत माघमै इन्डक्नका लागि त्यस्ता विद्यार्थीलाई आवेदन माग गरेको थियो । आपूर्ति कर्ता कम्पनीले गुणस्तरहीन चुलो ल्याएपछि निशुल्क चुलो वितरण अवरुद्ध भएको थियो ।
अतिदुर्गम र दुर्गमका विद्यार्थीलाई लक्षित गर्दै ८ हजार ३ सय थान विद्युतीय चुलो वितरण गर्ने भनिएकामा सो क्षेत्रका २ हजार ८६५ आवेदनमात्र योग्य भएकाले केन्द्रले अहिले ती विद्यार्थीलाई मात्र इन्डक्सन दिन थालेको हो ।
केन्द्रले सबै आवेदकलाई नै दिने गरी विद्युतीय चुलो खरिद गरेको थियो । तर हाललाई कार्यक्रमको कार्यविधि अनुसार नै क र ख बर्गका क्षेत्रका विद्यार्थीलाई मात्र २ हजार ८ सय ६५ जना लाई यस्तो चुलो वितरण गर्न लागिएको केन्द्रले जनाएको छ । बाँकी रहेको इन्डक्सन स्थानीय निकायसँगको लागत साझेदारीको कार्यक्रम अन्तरगत वितरण गर्ने केन्द्रको तयारी छ ।
गत आर्थिक वर्षमा इन्डक्सन वितरणका दुई कार्यक्रम अघि सारेको थियो । तर विद्युतीय चुलो आपूर्ति गर्ने ठेक्का पाएको कम्पनीको बदमासीले गर्दा विभिन्न २२ स्थानीय निकायसँगको लागत साझेदारीमा सर्वसाधारणलाई उपलब्ध गराउने व्यवस्था गरिएको विद्युतीय चुलो वितरण कार्यक्रम भने हाललाई स्थगित भएको रोकिएको छ ।
२२ हजार ३ सय थान इन्डक्सनको आपूर्तिको जिम्मा पाएको डोलेश्वर जेभी अहिले सम्पर्क विहीन छ । एइपीसीले ललितपुरका विभिन्न वडा, सिन्धुपाल्चोक प्यूठान लगायत तराइका विभिन्न स्थानीय निकायसँग लागत साझेदारीको समझदारी गरेको थियो । दुर्गमका विद्यार्थीलाई वितरण गरेर बाँकी रहेका इन्डक्सन स्थानीय निकायमार्पmत सर्वसाधारणलाई उपलब्ध गराउने केन्द्रले जनाएको छ ।
लामो समय सम्पर्क विहीन भएपछि आपूर्तिकर्तालाई कालो सूचीमा राख्न तयारीमा एइपीसी पुगेको छ । कम्पनीले करिव ६० लाख रुपैयाँ एडभान्स लगेको छ । सो रकम असुल गर्ने गरी बैंक ग्यारेन्टी जफत र सार्वजनिक खरिद ऐनको प्रावधान अनुसार कालोसूचीमा राख्ने तयारी भएको केन्द्रले जनाएको छ ।
देशमा विद्युत खपत बढाउने र इन्डक्सन चुलो प्रयोगको अभियान नै चलाउने उद्देश्यले एइपीसीले गत आर्थिक वर्षमै सम्पन्न गर्ने गरी ३० हजारभन्दा धेरै थान इन्डक्सन खरिद प्रक्रिया अगाडि बढाएको थियो ।
तर ठेक्का पाएका आपूर्तिकर्ताले निर्धारित गुणस्तरको भन्दा कमजोर इन्डक्सन ल्याएपछि एइपीसीले त्यसलाई स्वीकार नगरी फिर्ता गरिदिएको थियो । दुवै कार्यक्रमका लागि आएका इन्डक्सन परीक्षण गर्दा चुलोको आकार र क्षमता (हिटिङ पावर) मा समस्या देखिएको थियो । विद्यार्थीका लागि आपूर्ति गर्ने ठेक्का पाएको कम्पनीले दोस्रो लटमा मापदण्ड पुरा भएको चुलो ल्याएपछि केन्द्रले वितरण थालेको हो ।
Comments
