सरकार गठनका विषयमा छलफल गर्न सत्ता गठबन्धनको बैठक बस्दै
०९ पुस, काठमाडौं । सरकार गठनका विषयमा छलफल गर्न सत्ता गठबन्धनका दलहरुको बैठक बस्ने भएको छ। बैठक ४ बजेका लागि बोलाइएको प्रधानमन्त्रीका प्रेस सल्लाहकार गोविन्द परियारले जानकारी दिए।
बैठकमा सत्ता गठबन्धनमा रहेका सबै राजनीतिक दलहरुलाई बोलाइएको छ। सत्ता गठबन्धनमा कांग्रेस, माओवादी केन्द्र, एकीकृत समाजवादी, लोकतान्त्रिक समाजवादी पार्टी र राष्ट्रिय जनमोर्चा सहभागी छन्।
राष्ट्रपतिले प्रधानमन्त्रीमा दाबी गर्नका लागि आइतबार बेलुका ५ बजेसम्मको समय दिएकी छिन्। तर, सत्ता गठबन्धनका दलहरुबीच सुरुमा कसले सरकारको नेतृत्व गर्ने भन्नेमा सहमति जुट्न सकेको छैन। शेरबहादुर देउवा र पुष्पकमल दाहाल प्रचण्डले आफूले नै सुरुमा सरकारको नेतृत्व गर्ने दाबी गरिरहेका छन्।
कांग्रेस र माओवादी केन्द्रका पहिलो र दोस्रो तहका नेताबीच यसबीचमा भएका भेटघाटमा देउवा र प्रचण्डका लागि दाबी र अडान चलिरहेको छ। राष्ट्रपतिले दिएको समयसीमा आउनै लाग्दा दलहरु छलफलमा जुट्न लागेका हुन्।