निफ्राले मंसिर २९ गतेदेखि ५ अर्बको ऋणपत्र बिक्री खुला गर्ने
२० मंसिर, काठमाडाैं । नेपाल इन्फ्रास्ट्रक्चर बैंक लिमिटेड (निफ्रा) मंसिर २९ गत बिहीबारदेखि पाँच अर्ब मूल्यको बराबरको ‘निफ्रा उर्जा ऋणपत्र ७ प्रतिशत २०८५।८६’ नामक ऋणपत्र निष्काशन गर्ने भएको छ ।
वार्षिक ७ प्रतिशत ब्याजदरमा बैंकले ७ वर्ष अवधिको उक्त ऋणपत्र निष्काशन गर्न लागेको हो ।
प्रतिइकाई एक हजार अंकित दरका जारी हुने ५० लाख कित्ता ऋणपत्रमध्ये ४० प्रतिशत अर्थात २ अर्ब रुपैयाँ बराबरको २० लाख कित्ता सर्वसाधारणमा बिक्रीमा आउनेछ । सर्वसाधारणका लागि निष्काशन गरिएको ऋणपत्रमध्ये ५ प्रतिशत अर्थात १ लाख कित्ता ऋणपत्र सामूहिक लगानी कोषहरुका लागि छुट्याइएको छ । ६० प्रतिशत अर्थात ३ अर्ब रुपैयाँ बराबरको ३० लाख कित्ता भने बैंकले व्यक्तिगत तवरबाट बिक्री गर्नेछ ।
बैंकको ऋणपत्रमा लगानी गर्नेले न्यूनतम २५ कित्तादेखि अधिकतममा १ लाख कित्तासम्मका लागि आवेदन दिन सक्नेछन् । ऋणपत्रको बिक्री बन्द छिटोमा पुस ४ गते तथा ढिलोमा पुस १४ गते हुनेछ ।
सिडिएस एण्ड क्लियरिङ्ग लिमिटेडले विकास गरेको मेरो सेयर मोबाइल एप, मेरो सेयर वेवसाइटबाट लगानीकर्ताले अनलाइनबाट आवेदन दिन सक्नेछन् । यस्तै नेपाल धितोपत्र बोर्डबाट स्वीकृती प्राप्त आस्बा सेवामा सहभागी बैंक तथा वित्तीय संस्थाहरु तथा तिनका तोकिएका शाखा कार्यालयहरुबाट समेत सि आश्वा प्रणालीबाट ऋणपत्र किन्न सकिन्छ ।
बैंकको धितोपत्र निष्काशन तथा बिक्री प्रबन्धक एनआईबिएल एस क्यापिटल लिमिटेड रहेको छ ।