हिमालयन रिको खुद नाफा पौने २८ करोड, ब्याजबाटै ५० करोड धेरै कमायो
२८ भदाै, काठमाडाैं । हिमालयन रि इन्स्योेरेन्स कम्पनीले गत आर्थिक वर्ष २०७८/७९ को चौथो त्रैमाससम्ममा २७ करोड ८२ लाख ५४ हजार रुपैयाँ खुद नाफा कमाएको छ ।
विसं २०७८ चैत मसान्तसम्ममा १९ करोड ६४ लाख ५७ हजार रुपैयाँ खुद नाफा आर्जन गरेको कम्पनीले चैतदेखि असार मसान्तसम्मको तीन महिना अवधिमा नै ८ करोड १७ लाख ९७ हजार रुपैयाँ नाफा बढाएको हो ।
हिमालयन रिले गत आवमा कुल ८२ करोड ७६ लाख ४५ हजार रुपैयाँ आय (आम्दानी) गर्दा ८६ करोड ४२ लाख रुपैयाँ व्यय (खर्च) गरेको छ । यसबाट कम्पनीले ३ करोड ६५ लाख ५५ हजार नोेक्सानीमा पुगेको हो । यद्यपी कम्पनीले लगानी, कर्जा तथा अन्यबाट आय वापत ५३ करोड कमाएपछि पौने २८ करोड नाफा आर्जन गरेको हो ।
बीमा समितिको तथ्याङ्क अनुसार कम्पनीले २०७९ असार मसान्तसम्ममा ७ अर्ब ४४ करोड ४० लाख ४१ हजार रुपैयाँ लगानी गरेको छ । यसमध्ये कम्पनीले ६ अर्ब ८५ करोड ५० लाख रुपैयाँ वाणिज्य बैंकको मुद्दती निक्षेपमा लगानी गरेको छ । कुल लगानी रकमको ९२ प्रतिशत रकम मुद्दती निक्षेपमा लगानी गरेकाले कम्पनीको आम्दानीको स्रोत सबै ब्याजमा नै निर्भर रहेको देखिन्छ ।
समितिको तथ्याङ्क अनुसार कम्पनीले लगानी विविधिकरण नगरी कुल लगानीको ९२ प्रतिशत मुद्दती निक्षेपमा मात्र लगानी गरेको देखिन्छ । बाँकी ८ प्रतिशत रकम मात्र कम्पनीले ऋणपत्रमा लगानी गरेको छ । चौथो त्रैमाससम्ममा आइपुग्दा कम्पनीले लगानी, कर्जा तथा अन्यबाट आय वापत ५३ करोड १८ लाख ८१ हजार रुपैयाँ आम्दानी गरेको छ । असार मसान्तसम्ममा कम्पनीको दिर्घकालिन लगानी तथा कर्जा ५ अर्ब २४ करोड ५४ लाख र अल्पकालिन लगानी तथा कर्जा २ अर्ब ३० करोड ८४ लाख रुपैयाँ छ ।
सार्वजनिक वित्तीय विवरण अनुसार२०७९ असार मसान्तसम्मा कम्पनीले ७७ करोड १७ लाख ९५ हजार रुपैयाँ खुद बीमा शुल्क आर्जन गरेको छ । चैत मसान्तसम्म ४७ करोड ४९ लाख ६४ हजार रहेकोमा पछिल्लो तीन महिनामा २९ करोड ६८ लाख ३१ हजार रुपैयाँ वृद्धि भएको हो ।
चुक्ता पुँजी ७ अर्ब रुपैयाँ रहेको कम्पनीको वार्षिक प्रतिसेयर आम्दानी रुपैयाँ रहेको छ । कम्पनीको बीमा कोष पछिल्लो तीन महिनामा बढेर १४ करोड ३३ लाख बढेर १४ करोड ८१ लाख २० हजार रुपैयाँ छ । यस्तै जगेडा कोषमा १२ करोड ५१ लाख ८९ हजार रुपैयाँ सञ्चित छ । पछिल्लो तीन महिनामा कम्पनीको जगेडा कोष ७ करोड ५४ लाखले बढेको हो । कम्पनीको महाविपत्ति कोष १ करोड ३९ लाख रुपैयाँले बढेर १ करोड ४३ लाख ७० हजार रुपैयाँ पुगेको छ ।
कम्पनीले गत आवमा ३ करोड ३७ लाख ३९ हजार रुपैयाँ खुद दाबी भुक्तानी गरेको छ । कम्पनीले १४ करोड ७८ लाख ४१ हजार रुपैयाँ दाबी वापत भुक्तानी हुन बाँकी छ । गत आवमा कम्पनीको कुल बीमाशुल्क संकलन ८६ करोड ८७ लाख ७४ हजार रुपैयाँ छ ।