भरतपुर महानगरपालिकाको मेयरमा कांग्रेसका युवा नेता निलकण्ठ रिजालको दावेदारी
०४ वैशाख, चितवन । स्थानीय चुनाव आउन अव २६ दिन बाँकी छ । सरकारले स्थानीय चुनावको घोषणा गरेसंगै विभिन्न राजनीतिक दलहरूमा गठबन्धनका भैरहेको छ । चितवनको भरपुर महानगरपालिकामा पछिल्लो समय नेपाली कांग्रेस तथा नेकपा माओवादी केन्द्रले मेयरमा आफ्नो उम्मेदवार बनाउन कसरत गरिरहेको देखिन्छ ।
नेपाली कांग्रेसका युवा नेता निलकण्ठ शर्मा रिजालले पनि आसन्न स्थानीय तहको निर्वाचनमा भरतपुर महानगरपालिकाको दावेदारी पेश गरेका छन् ।
जिल्ला केन्द्रीत राजनीतिसँगै भरतपुरको मेयरमा दाबी गरेपछि उनको चर्चा चुलिएको हो । नेता रिजाल नेपाली कांग्रेस चितवनका महाधिवेशन प्रतिनिधि पनि हुन् । मेयरमा दावी गरेपछि नेता रिजालको नाम अहिले चितवन कांग्रेसभित्र चर्चामा छ ।
रिजालले आइतबार नेपाली कांग्रेस जिल्ला समक्ष भरतपुरको मेयरका लागि आफ्नो नाम प्रस्तुत गरेका छन् । पार्टीले टिकट दिए ‘शिक्षा, स्वास्थ्य र पर्यटनमा मुलुककै केन्द्र बनाउने हाम्रो रहर, कृषिमा आत्मनिर्भर प्रविधिमैत्री हाम्रो भरतपुर महानगर’ नारा लिएर चुनावी मैदानमा उत्रिने रिजालले डिजिटल खबरलाई जानकारी दिनुभयो ।
रिजालको राजनीतिक यात्रा २०४९ सालदेखि नै नेपाल विद्यार्थी संघ वडा इकाई समितिको अध्यक्ष हुँदै राजनीतिमा सक्रिय बनेका थिए । उनी २०५३ सालमा वीरेन्द्र बहुमुखी क्याम्पसमा स्ववियूको सदस्य, २०५५ मा स्ववियू सचिव हुँदै प्राविधिक विद्यार्थी परिषद्को केन्द्रीय अध्यक्ष बनेका थिए । रिजाल २०६१ मा नेविसंघको केन्द्रीय सदस्य, ०६४ मा सहमहामन्त्री र २०७४ मा नेविसंघको केन्द्रीय उपाध्यक्षमा निर्वाचित भएका थिए । उनी हाल नेपाली कांग्रेसको महाधिवेशन प्रतिनिधि छन् ।
आफूलाई टिकट दिए भरतपुरको विकासमा लहर ल्याउने रिजालको दावी छ । उनले यसपटक भरतपुरमा कांग्रेस उम्मेदवारलाई भोट हाल्ने वातावरण बनाउन पर्नेमा जोडदिनुभएको छ ।
रिजाल नेपाली कांग्रेसको प्रमुख भातृ संस्था नेविसंघको केन्द्रीय राजनीतिमा लामो समय काम गरेर एक इमानदार र कुशल संगठनकर्ताको छवी बनाएका नेताभित्र पर्छन् । रिजाल विगत केही वर्षदेखि चितवन जिल्ला केन्द्रित राजनीतिमा सक्रिय रहँदै आएका छन् ।
केन्द्रदेखि स्थानीयस्तरसम्म राम्रो पहुँच बनाउन सफल रिजाल युवापंक्ति नै उम्मेदवार बन्नुपर्ने बताउँछन् । उनी भन्छन्, ‘युवा पंक्तिलाई उम्मेदवार बनाउनुपर्छ, अब देश युवाले चलाउने हो, यस देशको मुहार फेर्न युवा पंक्ति नै नेतृत्वमा आउनुपर्छ भन्ने मेरो मान्यता छ ।’
बारम्बार राजनीतिमा अवसर पाउँदै गर्दा युवा सधैँ बहिस्कृत हुनुपर्ने अवस्थाको अन्त्य हुनुपर्ने उनको भनाइ छ । युवा नेता रिजाल लामो समय नेविसंघको केन्द्रीय सदस्य, सहमहामन्त्री हुँदै उपाध्यक्षसम्म बनेका हुन् । नेपाली कांग्रेसको वर्तमान केन्द्रीय समिति अधिकांस नेविसंघको राजनीतिबाटै उदाएका छन्।
भरतपुरको वीरेन्द्र बहुमुखी क्याम्पसबाट राजनीतिमा अगाडि बढेका रिजाल पछिल्लो समय चितवन कांग्रेसका सबै गतिविधिमा सरिक हुँदै आएका छन् ।
भरतपुरमै जन्मेर, भरतपुरकै माटोमा हुर्के बढेको हुनाले भरतपुरवासीको वास्तविक समस्या आफूले लामो समय अगाडिदेखि नै देखेको, बुझेको र प्रत्यक्ष अनुभव गर्ने अवसर पाएकाले महानगरवासीको मन जित्न सक्ने उनको दावी छ । भरतपुरलाई देशकै नमुना शहर बनाउने आफूसँग स्पष्ट दृष्टिकोण र कार्ययोजना समेत रहेको उनले बताउनुभएको छ ।