Nepal's No. 1 Digital News Portal, Business, Corporate, Tourism, Politics, Sports, Entertainment, digitalkhabar.com ...express media network

वाणिज्य बैंकको वित्तीय विवरण सार्वजनिक, यस्तो छ अवस्था

0 265

३२ श्रावण, काठमाडाैं । वाणिज्य बैंकमध्ये हालसम्म १९ बैंकले गत आर्थिक वर्षको चौथो त्रैमाससम्मको वित्तीय विवरण सार्वजनिक गरेका छन् । कुमारी बैंक, एभरेष्ट बैंक, नेपाल इन्भेष्टमेण्ट बैंक, लक्ष्मी बैंक, मेगा बैंक, हिमालयन बैंक, सिद्धार्थ बैंक र एनआईसी एशिया लगायत १९ बैंकले गत आर्थिक वर्षको चौथो त्रैमाससम्मको वित्तीय विवरण सार्वजनिक गरेका हुन् ।

कुन बैंकले कति नाफा कमाए ?  हेर्नुहोस् :

१. कुमारी बैंक 

कुमारी बैंकले गत आर्थिक वर्षको चौथो त्रैमाससम्म अघिल्लो वर्षभन्दा ७२ दशमलव ७४ प्रतिशत बढी खुद नाफा गरेको छ । अघिल्लो वर्ष १ अर्ब १५ करोडभन्दा बढी खुद नाफा गरेको कम्पनीले गत वर्ष २ अर्बभन्दा बढी खुद नाफा गरेको हो । बैंकको वितरण योग्य नाफा अघिल्लो वर्षभन्दा ५३ दशमलव ४९ प्रतिशत बृद्धि भई १ अर्ब ९ करोडभन्दा बढी कायम भएको छ ।

२. एभरेष्ट बैंक 

काठमाडौं । एभरेष्ट बैंक लिमिटेडले गत आर्थिक वर्षको चौथो त्रैमाससम्म रू. १ अर्ब ८२ करोड ८२ लाखभन्दा बढी खुद नाफा गरेको छ । बैंकले सार्वजनिक गरेको उक्त अवधिसम्मको वित्तीय विवरण अनुसार अघिल्लो वर्षको सोही अवधिको तुलनामा गत वर्ष बैंकको खुद नाफा २७ दशमलव ३४ प्रतिशत कम भएको हो । अघिल्लो वर्ष बैंकले १ अर्ब ६७ करोड ३१ लाखभन्दा बढी खुद नाफा गरेको थियो । गत चौथो त्रैमाससम्म भने बैंकको वितरणयोग्य नाफा २ अर्ब ३६ करोड ४९ लाखभन्दा बढी रहेको छ । अघिल्लो वर्षभन्दा गत वर्ष बैंकको वितरणयोग्य नाफा भने ४१ दशमलव ३५ प्रतिशत बृद्धि भएको हो ।

३. नेपाल इन्भेष्टमेण्ट बैंक 

नेपाल इन्भेष्टमेण्ट बैंक लिमिटेडले गत आर्थिक वर्षको चौथो त्रैमाससम्म अघिल्लो वर्षभन्दा ५० दशमलव ६९ प्रतिशत बढी खुद नाफा गरेको छ । अघिल्लो वर्ष २ अर्ब ४२ करोड ३१ लाखभन्दा बढी खुद नाफा गरेको बैंकले गत वर्ष ३ अर्ब ६५ करोड १४ लाखभन्दा बढी यो नाफा गरेको हो । अघिल्लो वर्षभन्दा गत वर्ष बैंकको वितरणयोग्य मुनाफा भने २०५ दशमलव ५५ प्रतिशत बढी एक अर्ब ९९ करोड ३३ लाख रुपैयाँ भन्दाबढी कायम भएको छ ।

४. लक्ष्मी बैंक

लक्ष्मी बैंक लिमिटेडले गत आर्थिक वर्षको चौथो त्रैमाससम्म १ अर्ब ५४ करोड १३ लाखभन्दा बढी खुद नाफा गरेको छ । अघिल्लो वर्षभन्दा गत वर्ष खुद नाफा ९ दशमलव २० प्रतिशत बढेको हो । अघिल्लो वर्ष बैंकको यो नाफा रू. १ अर्ब १२ करोड ७२ लाखभन्दा बढी रहेको थियो । यस अवधिसम्म बैंकको वितरणयोग्य नाफा भने अघिल्लो वर्षभन्दा करिब ११ प्रतिशत कम भएको छ ।

५. मेगा बैंक 

मेगा बैंक नेपाल लिमिटेडले गत आर्थिक वर्षको चौथो त्रैमाससम्म रू. २ अर्ब ३० करोड २५ लाखभन्दा बढी खुद नाफा गरेको छ । अघिल्लो वर्षको सोही अवधिको भन्दा गत वर्ष खुद नाफा ४५ दशमलव १६ प्रतिशत बढी भएको हो । अघिल्लो वर्ष यस अवधिसम्म बैंकले रू. १ अर्ब ५८ करोड ६२ लाखभन्दा बढी खुद नाफा गरेको थियो । यस अवधिसम्म बैंकको वितरणयोग्य नाफा भने रू. १ अर्ब ५१ करोड ५८ लाखभन्दा बढी छ ।

६. हिमालयन बैंक

गत आर्थिक वर्षको चौथो त्रैमाससम्म हिमालयन बैंक लिमिटेडले रू. २ अर्ब ९९ करोड ८० लाख खुद नाफा गरेको छ । अघिल्लो वर्षभन्दा गत वर्ष १५ दशमलव ९० प्रतिशतले खुद नाफा बृद्धि भएको हो । यस अवधिसम्म बैंकको वितरण योग्य नाफा भने ६५ दशमलव ७४ प्रतिशत बढी रू. २ अर्ब १६ करोड ९८ लाखभन्दा बढी रहेको छ ।

७. सिद्धार्थ बैंक

सिद्धार्थ बैंकले गत आर्थिक वर्षको चौथो त्रैमाससम्म रू. २ अर्ब ८३ करोड ६१ लाखभन्दा बढी खुद नाफा गरेको छ । यो नाफा अघिल्लो वर्षको सोही अवधिको तुलनामा ३२ दशमलव ३१ प्रतिशत बढी हो । अघिल्लो वर्ष बैंकले रू. २ अर्ब १४ करोड ३६ लाखभन्दा बढी यो नाफा गरेको थियो । बैंकको वितरणयोग्य नाफा भने रू. १ अर्ब २१ करोड ७६ लाखभन्दा बढी छ ।

८. एनआईसी एशिया बैंक   

गत आर्थिक वर्षको चौथो त्रैमाससम्म एनआईसी एशिया बैंकले रू. ३ अर्ब २५ करोड १० लाखभन्दा बढी खुद नाफा गरेको छ । अघिल्लो वर्ष रू. ३ अर्ब ९ करोड ८५ लाखभन्दा बढी खुद नाफा गरेको बैंकले गत वर्ष ४ दशमलव ९२ प्रतिशत बढी यो नाफा गरेको हो । यस अवधिसम्म बैंकले ८ दशमलव २१ प्रतिशत बढी रू. ४ अर्ब ७९ करोड ८८ लाखभन्दा बढी सञ्चालन नाफा गरेको छ । बैंकको वितरणयोग्य नाफा भने ३३ दशमलव ३८ प्रतिशत बृद्धि भई रू. १ अर्ब ९२ करोड १७ लाखभन्दा बढी रहेको छ ।

९. प्राइम कमर्सियल बैंक 

प्राइम कमर्सियल बैंकले गत आर्थिक वर्षमा  ३ अर्ब २५ करोड रुपैयाँ नाफा गरेको छ । बैंकले गत आर्थिक वर्षमा नाफामा ४४.५६ प्रतिशतले बढाएको छ । अघिल्लो आर्थिक वर्षमा प्राइम बैंकले २ अर्ब २५ करोड रुपैयाँ नाफा गरेको थियो । बैंकले शेयरधनीलाई वितरण गर्न मिल्ने नाफा २ अर्ब ६६ करोड ३१ लाख रुपैयाँ रहेको छ ।

१०. माछापुच्छ्रे बैंक  

माछापुच्छ्रे बैंकले एक अर्ब  ६३ करोड ६ लाख रुपैयाँ नाफा कमाएको छ । बैंकको नाफा अघिल्लो आर्थिक वर्षको यसै अवधिको भन्दा २९.३६ प्रतिशत धेरै हो । गत आर्थिक वर्षमा बैंकको वितरण योग्य नाफा एक अर्ब १३ करोड रुपैयाँ छ ।

११. प्रभु बैंक 

प्रभु बैंकले गत आर्थिक वर्षको चौथो त्रैमासमा २ अर्ब १ करोड रुपैयाँ नाफा कमाएको छ । गत आर्थिक वर्षमा बैंकले ६८.४५ प्रतिशतले नाफा बढेको वित्तीय विवरण सार्वजनिक गरेको छ । अघिल्लो वर्ष बैंकले १ अर्ब १९ करोड रुपैयाँ मात्रै नाफा कमाएको थियो ।

१२. एनएमबि बैंक

एनएमबि बैंकले गत आर्थिक वर्षमा ५९.४२ प्रतिशतले नाफा बढाएर २ अर्ब ७३ करोड रुपैयाँ पुर्याएको छ । अघिल्लो वर्ष बैंकको नाफा १ अर्ब ७१ करोड थियो । बैंकले असार मसान्तसम्ममा १ खर्ब ६४ अर्ब रुपैयाँ निक्षेप संकलन गरेर १ खर्ब ५० अर्ब रुपैयाँ कर्जा दिएको छ । बैंकले शेयरधनीलाई बाढ्न मिल्ने नाफा २ अर्ब ३३ करोड रुपैयाँ गरेको छ ।

१३. राष्ट्रिय वाणिज्य बैंक 

राष्ट्रिय वाणिज्य बैंकले गत आर्थिक वर्षको चौथो त्रैमाससम्म ३ अर्ब ७९ करोड खुद मुनाफा आर्जन गर्न सफल भएको छ । यस अवधिमा बैंकको खुद ब्याज आम्दानी ८ अर्ब २४ करोड, कुल संचालन आम्दानी ९ अर्ब ७६ करोड, संचालन नाफा ५ अर्ब ९ करोड, कूल समग्र आम्दानी ६ अर्ब ३७ करोड तथा वितरणयोग्य मुनाफा ४ अर्ब ५२ करोड रहेको छ ।

१४. सानिमा बैंक 

सानिमा बैंक लिमिटेडले गत आर्थिक वर्षको चौथो त्रैमाससम्म रू. २ अर्ब २७ करोड ६४ लाखभन्दा बढी खुद नाफा गरेको छ । अघिल्लो वर्ष रू. १ अर्ब ७७ करोड ६२ लाखभन्दा बढी खुद नाफा गरेको बैंकले यस वर्ष २८ दशमलव १६ प्रतिशत बढी यो नाफा गरेको छ ।

१५. कृषि विकास बैंक

कृषि विकास बैंक लिमिटेडले गत आर्थिक वर्षको चौथो त्रैमाससम्म अघिल्लो वर्षभन्दा ११ प्रतिशत बढी खुद नाफा गरेको छ । अघिल्लो वर्ष रू. ३ अर्ब ३३ करोड १७ लाख ३७ हजार खुद नाफा गरेको कम्पनीले गत वर्ष सोही अवधिमा रू. ३ अर्ब ६९ करोड ४४ लाख ७० हजार यो नाफा गरेको हो । बैंकको वितरणयोग्य नाफ भने अघिल्लो वर्षभन्दा ४ दशमलव १८ प्रतिशत बढी रू. १ अर्ब ७३ करोड ५० लाख १ हजार रहेको छ । अघिल्लो वर्ष यो अवधिसम्म बैंकको वितरणयोग्य नाफा रू. १ अर्ब ६६ करोड ५३ लाख ९५ हजार थियो ।

१६. नेपाल बङ्गलादेश बैंक
गत आर्थिक वर्षको चौथो त्रैमाससम्म नेपाल बङ्गलादेश बैंकले रू. २ अर्ब २९ करोड २५ लाख ९२ हजार खुद नाफा गरेको छ । अघिल्लो वर्षभन्दा ८४ दशमलव १७ प्रतिशतले नाफा बढेको हो । अघिल्लो वर्ष यस अवधिसम्म बैंकको नाफा रू. १ अर्ब २४ करोड ४८ लाख ४६ हजार थियो । गत चौथो त्रैमाससम्म बैंकको वितरणयोग्य नाफा पनि अघिल्लो वर्षभन्दा २२८ दशमलव ४९ प्रतिशत बृद्धि भएको छ । अघिल्लो वर्ष रू. ४४ करोड ९१ लाख १४ हजार रहेको वितरणयोग्य नाफा गत वर्ष रू. १ अर्ब ४७ करोड ५२ लाख ८३ हजार रहेको छ ।

१७. सिटिजन्स बैंक

सिटिजन्स बैंक इन्टरनेशनल लिमिटेडले गत आर्थिक वर्षको चौथो त्रैमाससम्म १ अर्ब ५९ करोड ८७ लाख ९३ हजार खुद नाफा गरेको छ । यो नाफा अघिल्लो आर्थिक वर्षको चौथो त्रैमाससम्म रू. १ अर्ब १९ करोड ८५ लाख ४ हजार थियो । अघिल्लो वर्षको तुलनामा बैंकको खुद नाफा ३३ दशमलव ४० प्रतिशत बढेको छ । गत वर्षको चौथो त्रैमाससम्म बैंकको वितरणयोग्य नाफा रू. १ अर्ब ५७ करोड ८५ लाख ५० हजार छ ।

१८. नेपाल क्रेडिट एण्ड कमर्श बैंक 

नेपाल क्रेडिट एण्ड कमर्श बैंक लिमिटेड (एनसीसी)ले गत आर्थिक वर्षको चौथो त्रैमाससम्ममा एक अर्ब २७ करोड १२ लाख ३३ हजार रुपियाँ खुद नाफा कमाएको छ । यो बैैंकको यस्तो नाफा अघिल्लो आवको तुलनामा १४.६८ प्रतिशतले बढेको हो । अघिल्लो आवमा योे बैंकले एक अर्ब १० करोड ८४ लाख ७३ हजार रुपियाँ यस्तो खुद नाफा आर्जन गरेको थियो । बैंकको वितरणयोग्य मुनाफा भने २.१२ प्रतिशत बढेर ७१ करोड ४७ लाख ५९ हजार रुपियाँ रहेको छ ।

१९. सिभिल बैंक 

सिभिल बैंकले गत आर्थिक वर्षको चौथो त्रैमासम्ममा ५५ करोड ९३ लाख रुपियाँ खुद नाफा आर्जन गरेको छ । अघिल्लो आवको सोही अवधिमा बैंकले ५५ करोड ५० लाख रुपियाँ खुद नाफा आर्जन गरेको थियो । अघिल्लो आवको सोही अवधिको तुलनामा बैंकले गत आवमा ४३ लाख रुपियाँले मात्रै खुद नाफा बढाउन सकेको हो । यस बैंकको वितरणयोग्य मुनाफा ४९ करोड ८५ लाख रुपियाँ रहेको छ ।



मल्टिमिडिया ग्यालरी

Comments

comments

Subscribe to our newsletter
Sign up here to get the latest news, updates and special offers delivered directly to your inbox.
You can unsubscribe at any time
Leave A Reply

Your email address will not be published.