श्रीलङ्कामा चक्रवातको प्रभाव: मुसलधारे वर्षापछि देशभरका विद्यालय बन्द

११ कार्तिक, काठमाडौँ। बङ्गालको खाडीमा विकसित ‘अर्णव’ चक्रवातका कारण श्रीलङ्कामा मुसलधारे वर्षा भइरहेको छ। मौसमको अवस्थालाई ध्यानमा राख्दै सरकारले देशभरका सबै विद्यालय बन्द गर्ने निर्णय गरेको छ। समुद्री क्षेत्रमा चार मिटरसम्म अग्लो छाल आउने सम्भावना रहेकाले माछा मार्ने कार्यमा पूर्ण प्रतिबन्ध लगाइएको छ।

शिक्षा मन्त्रालयले विद्यार्थी र कर्मचारीको सुरक्षाका लागि विद्यालय बन्द गरिएको जनाएको छ। यद्यपि, सामान्य शिक्षा प्रमाणपत्र तहको सौन्दर्यसम्बन्धी व्यावहारिक परीक्षा भने पूर्व निर्धारित तालिका अनुसार नै सञ्चालन हुने मन्त्रालयले स्पष्ट पारेको छ। भीषण वर्षाका कारण बाढी र पहिरोको जोखिम बढेपछि विभिन्न क्षेत्रमा उच्च सतर्कता अपनाउन चेतावनी जारी गरिएको छ।

भारतीय मौसम विज्ञान विभागका अनुसार चक्रवात पश्चिम-उत्तर-पश्चिम दिशातर्फ १७ किमी प्रतिघण्टाको गतिमा अगाडि बढिरहेको छ। यो आँधी बुधबार बिहान भारतको विशाखापट्टनम र बापटला तटीय क्षेत्रमा ठोक्किने अनुमान गरिएको छ। चक्रवातको प्रभावले श्रीलङ्का र भारतका साथै बङ्गालको खाडीनजिकका अन्य दक्षिण एसियाली देशहरूमा समेत असर पर्न सक्ने मौसमविद्ले जनाएका छन्।

अत्यन्त शक्तिशाली मानिएको यस चक्रवातको केन्द्र वरिपरि हावाको गति २१५ देखि २२० किमी प्रतिघण्टासम्म पुगेको छ। तटीय क्षेत्रमा ठोक्किने समयमा यसको गति १३५ किमी प्रतिघण्टा रहने पूर्वानुमान छ। चक्रवातको जोखिम बढेपछि भारतको आन्ध्र प्रदेश र काकिनाडा क्षेत्रबाट करिब ८९ हजार नागरिकलाई सुरक्षित स्थानमा सारिएको छ। साथै, ५० भन्दा बढी रेल सेवा र हवाई उडान रद्द गरिएको छ।