सुनको भाउले लगातार तोड्दै रेकर्ड, बुधबार एकैदिन १६०० ले बढ्यो
१३ मंसिर, काठमाडाैं । सुनको भाउले लगातार नयाँ रेकर्ड कायम गरेको छ । सोमबार १ लाख १७ हजार ४०० रुपैयाँ पुगेर रेकर्ड बनाएको सुनको भाउ मंगलबार ३०० रुपैयाँ बढेर नयाँ रेकर्ड बनाएको थियो । आज १६०० रुपैयाँ बढेसँगै सुनको भाउ पुनः ऐतिहासिक बिन्दुमा पुगेको हो ।
बुधबार छापावाला सुनको भाउ १ लाख १९ हजार ३०० रुपैयाँ तोकिएको छ । मंगलबार छापावाला सुनको भाउ १ लाख १७ हजार ७०० रुपैयाँ तोकिएको थियो ।
विश्व बजारमा प्रचलनमा रहेको मुद्रा अमेरिकी डलरको विकल्पमा ब्रिक्स मुलुकहरुले ’गोल्ड ब्याक करेन्सी’ प्रचलनमा ल्याउने तयारी गरिरहँदा विश्व बजारमा सुनको माग बढिरहेको छ ।
नेपाल सुन चाँदी व्यवसायी महासंघका अध्यक्ष मणिक रत्न शाक्यले समग्र विश्वको वित्तिय प्रणालीले सुनको भाउलाई असर गरिरहेकोले अझै भाउ बढ्न सक्ने बताए । उनले भने, “अन्तर्राष्ट्रिय बजारमा सन् २०२४ सम्ममा प्रतिऔंस सुनको भाउ ३ हजार डलरसम्म पुग्न सक्छ । ” यसरी विभिन्न कारणले विश्व बजारका लगानीकर्ताहरु सुनतर्फ आकर्षित हुँदा सुनको भाउ बढेको हो ।
बुधबार प्रतितोला तेजावी सुनको भाउ १ लाख १८ हजार ७५० रुपैयाँ कायम भएको महासंघले जनाएको छ । मंगलबार प्रतितोला तेजावी सुनको भाउ १ लाख १७ हजार १५० रुपैयाँ तोकिएको थियो ।
महासंघका अनुसार बुधबार प्रतितोला चाँदी १ हजार ५२० रुपैयाँ तोकिएको छ । मंगलबार प्रतितोला चाँदी १ हजार ५०० रुपैयाँमा कारोबार भएको थियो ।
अन्तर्राष्ट्रिय बजारमा मंगलबार प्रतिऔंस सुन २ हजार ०४३ दशमलव ८५ डलरमा कारोबार भइरहेको छ भने प्रतिऔंस चाँदी २४ दशमलव ९८ डलरमा कारोबार भइरहेको छ ।