‘रामायण’को अग्रिम टिकट बुकिङ सुरु हुँदै

०३ कार्तिक, मुम्बई । रणवीर कपूर, यश र साई पल्लवीको मुख्य भूमिका रहेको बहुप्रतीक्षित चलचित्र ‘रामायण’को अग्रिम टिकट बुकिङ अक्टोबर २० देखि भारतभर सुरु हुने भएको छ।

नितेश तिवारीको निर्देशनमा बनेको यो चलचित्र ५ नोभेम्बर २०२६ मा विश्वभरका सिनेमाघरहरूमा प्रदर्शन हुँदैछ।

दसैँको अवसर पारेर सुरु हुन लागेको बुकिङसँगै दर्शकहरूले प्रमुख टिकट बुकिङ प्लेटफर्महरूबाट आफ्नो सिट सुरक्षित गर्न सक्नेछन्। भारतीय पौराणिक कथामा आधारित यस चलचित्रलाई भव्य सिनेमाई स्तरमा तयार पारिएको छ। निर्माताहरूले रामायणको कालजयी कथालाई आधुनिक प्रविधि र उत्कृष्ट भिजुअल्समार्फत प्रस्तुत गर्ने लक्ष्य राखेका छन्।

चलचित्रको मुख्य आकर्षण यसको स्टारकास्ट र भारी बजेट हो। रणवीर कपूर र यश जस्ता चर्चित कलाकारहरू एकैसाथ हुनुका साथै साई पल्लवीको उपस्थितिले पनि दर्शकमाझ उत्सुकता बढाएको छ। यस चलचित्रलाई भारतीय बजारमा मात्र सीमित नराखी अन्तर्राष्ट्रिय स्तरमा पनि ठुलो ढाँचामा प्रदर्शन गर्ने तयारी गरिएको छ।

‘रामायण’लाई दुई भागमा विभाजन गरेर प्रदर्शन गरिनेछ। नमित मल्होत्राको प्राइम फोकस स्टुडियोज र यशको मनस्टर माइन्ड क्रिएसन्सको सहकार्यमा बनेको यस आयोजनामा भारतीय तथा अन्तर्राष्ट्रिय प्राविधिक टोलीको सहभागिता रहेको छ। कथालाई विस्तारमा प्रस्तुत गर्न दुई भागमा बनाइएको हो, जसले दर्शकलाई विभिन्न प्रसङ्ग र पात्रहरूलाई नजिकबाट नियाल्ने मौका दिनेछ।

यस चलचित्रको अर्को मुख्य विशेषता यसको सङ्गीत हो। हलिउडका प्रसिद्ध सङ्गीतकार हन्स जिमर र भारतीय सङ्गीतकार एआर रहमानले संयुक्त रूपमा ‘रामायण’को सङ्गीत तयार पारेका छन्। हन्स जिमर अन्तर्राष्ट्रिय सिनेमामा आफ्नो प्रभावशाली ब्याकग्राउन्ड स्कोरका लागि चिनिन्छन् भने एआर रहमान भारतीय सङ्गीत क्षेत्रका स्थापित नाम हुन्।

‘रामायण’लाई आइम्याक्सलगायत विभिन्न प्रिमियम ढाँचामा विश्वभर प्रदर्शन गरिनेछ। चलचित्र ५ नोभेम्बर २०२६ मा हिन्दी, तमिल, तेलुगु, कन्नड र मलयालम भाषामा एकैसाथ हलहरूमा आउनेछ। चलचित्रको दोस्रो भाग भने सन् २०२७ को तिहार (दिवाली) मा प्रदर्शन गर्ने तालिका छ।