के अमेरिकाले इरानको ६ अर्ब डलर सम्पत्ति फुकुवा गरेकाे हाे?

२८ चैत, काठमाडौँ। इरानका एक उच्च स्रोतले शनिबार अमेरिकाले कतारसहित विदेशी बैंकमा रोक्का रहेका इरानी सम्पत्ति फुकुवा गर्न सहमति जनाएको दाबी गरे पनि अमेरिकी अधिकारीले उक्त दाबी तुरुन्तै अस्वीकार गरेका छन्।

इरानी स्रोतका अनुसार इस्लामाबादमा जारी वार्तामा अमेरिकाले सम्पत्ति फुकुवा गर्न सकारात्मक संकेत दिएको र यसलाई सहमतितर्फको “गम्भीरता” का रूपमा हेरिएको छ। उनले होर्मुज जलडमरू मार्गमा सुरक्षित आवागमन सुनिश्चित गर्ने विषयसँग यो निर्णय प्रत्यक्ष रूपमा जोडिएको बताएका छन्।

अर्का एक इरानी स्रोतले करिब ६ अर्ब अमेरिकी डलर बराबरको रकम फुकुवा गर्ने सहमति भएको दाबी गरेका छन्। उक्त रकम सन् २०१८ देखि रोक्का रहेको थियो, जुन दक्षिण कोरियामा रहेको इरानको तेल बिक्रीबाट आएको थियो।

यो रकम सन् २०२३ मा कैदी आदानप्रदान सम्झौता अन्तर्गत फुकुवा हुने भनिएको थियो। तर, इजरायलमाथि हमासको आक्रमणपछि अमेरिकी प्रशासनले पुनः रोक्का गरेको थियो।

अमेरिकी अधिकारीहरूले भने उक्त रकम अहिले पनि कडाइका साथ नियन्त्रणमा रहेको र केवल मानवीय प्रयोजन—खाद्य, औषधि र स्वास्थ्य सामग्री खरिदका लागि मात्रै प्रयोग गर्न पाइने स्पष्ट पारेका छन्। नयाँ रूपमा पूर्ण फुकुवा गर्ने कुनै सहमति नभएको उनीहरूको भनाइ छ।

यो रकम सन् २०१८ मा अमेरिकाले इरानमाथि पुनः प्रतिबन्ध लगाएपछि रोक्का गरिएको थियो, जसले इरानलाई अन्तर्राष्ट्रिय वित्तीय प्रणालीबाट अलग गरेको थियो।

विपरीत दाबीहरूले वासिङ्टन र तेहरानबीचको अविश्वास अझै गहिरो रहेको संकेत दिएका छन्, जहाँ समुद्री सुरक्षा र आर्थिक पहुँच वार्ताका प्रमुख मुद्दा बनेका छन्।