Advertisement
व्यक्तिकै नाममा छानबिन हुनुपर्ने कांग्रेसको अडान यथावत्
१३ जेठ, काठमाडाैँ । प्रधानमन्त्री पुष्पकमल दाहाल प्रचण्ड र कांग्रेस सभापति शेरबहादुर देउवाबीचको भेटवार्ता सकिएको छ । भेटवार्तापछि कांग्रेस सहमहामन्त्री जीवन परियारले कुरा जहाँको त्यही रहेको संकेत गरे ।
आज एमाले, कांग्रेस र माओवादीका तीन शीर्ष नेता बालुवाटारमा बिहान ९ बजे भेट्ने तय भएको थियो । तर, स्वास्थ्यको कारण देखाएर देउवाले असमर्थता व्यक्त गरे । उनले बरु आफ्नै निवासमा भेट्न बोलाएका थिए । उनको आग्रहमा प्रचण्ड बुढानिलकण्ठ गएका हुन् । ओली भने गएनन् ।
सुरुमा प्रचण्ड र देउवाको वान टु वान कुराकानी भएको थियो । त्यसपछि कांग्रेसका केही नेताहरु मिसिएका थिए । प्रचण्ड–देउवा भेट सहकारी छानविनको विषयमा नै केन्द्रीत भए पनि निस्कर्षमा नपुगेको परियारले जानकारी दिए ।
भेटपछि पत्रकारसँग कुरा गर्द उनले भने, ‘प्रधानमन्त्री अत्यन्तै गम्भीर देखिनुभएको छ । भरे साँझ वा भोलिसम्ममा सहमति निकालौं भन्ने उहाँको आग्रह थियो । तर, विषयवस्तुमा कुरा मिलेको छैन ।
सत्ता पक्षले चलाखी गरेर गृहमन्त्रीलाई उन्मुक्ति दिन खोजिरहेको परियारले आरोप लगाए ।
उनले थपे, ‘हामीले रविको नाम नराख्दै गर्दा कस्तो प्रस्ताव आउँछ त सत्तापक्षबाट भनेर पर्खिरहेको अवस्था हो । तर उहाँहरु ठीक ठाउँमा हुनुहुन्न । छानविन गर्ने ठाउँमा नै आइपुग्नुभएको छैन । थप छलफल गरेर अगाडि बढ्ने कुरा भएको छ ।’
परियारका अनुसार प्रधानमन्त्री प्रचण्डले गोर्खा मिडिया नेटवर्कको अध्ययन गर्ने भइसकेपछि रविको नाम नलेख्दा पनि हुँदैन भनेर देउवासँग प्रस्ताव गरेका थिए । तर, आफूहरु यसमा तयार नरहेको उनले बताए ।
संस्थाकै नाम किटानी भइसकेपछि त्यसमार्फत व्यक्तिसम्म पुग्न सकिँदैन र रु भन्ने पत्रकारको प्रश्नमा उनले जवाफ दिए, ‘उहाँहरु यति चलाखिपूर्ण ढंगले कम्पनीले पैसा लिँदा कम्पनी मात्रै जवाफ देही हुने हो, सञ्चालक मात्रै जवाफदेही हुन्छ भन्ने कुरा गर्नुभएको छ । तर यसबाट समाधान निस्किदैन र उहाँहरु उम्किने बाटोतिर जानुभएको छ भन्ने हाम्रो भनाइ हो ।’
मल्टिमिडिया ग्यालरी
Comments
