इङ्गल्यान्डका पूर्व फुटबलर स्टेन बाउल्सको निधन
१३ फागुन, काठमाडौँ । इङ्गल्यान्डको राष्ट्रिय फुटबल टोलीका पूर्व खेलाडी स्टेन बाउल्सको निधन भएको छ । आफ्नो समयका चर्चित स्ट्राइकर बाउल्सको शनिबार राति ७५ वर्षको उमेरमा निधन भएको समाचारमा जनाइएको छ ।
बाउल्सले इङ्लिस प्रिमियर लिग क्लब म्यानचेस्टर सिटी, क्विन्स पार्क रेन्जर्स, ब्रेन्टफोर्डलगायतका क्लबबाट व्यावसायिक फुटबल खेलेका थिए । उनी लामो समयदेखि अल्जाइमर रोगबाट पीडित थिए । उनले आफ्नो सक्रिय खेल जीवनमा पाँच सय ६० भन्दा बढी खेल खेलेका थिए ।
बाउल्सले सन् १९७४ देखि सन् १९७७ सम्म इङ्गल्यान्डको राष्ट्रिय टोलीबाट खेलेका थिए । उनले क्विन्स पार्क रेन्जर्सका लागि मात्र तीन सय १५ खेल खेल्दै ९७ गोल गरेका थिए ।
‘बाउल्स आफ्नो समयका निकै प्रभावशाली खेलाडी थिए । उनी हाम्रो क्लबसँग अभिन्न रूपमा जोडिएका थिए । उनको निधनको खबरले हामी स्तब्ध: बनेका छौँ । हामी उहाँप्रति हार्दिक श्रद्धाञ्जली अर्पण गर्दछौँ,’ क्विन्स पार्क रेन्जर्सद्वारा जारी विज्ञप्तिमा भनिएको छ ।