पाँच महिनामा बाहिरियो दुई अर्ब ७२ करोड रेमिट्यान्स
०३ माघ, काठमाडाैं । चालु आर्थिक बर्ष २०७९/८० को पहिलो पाँच महिनाको अवधिमा २ अर्ब ७२ करोड रुपैयाँ रेमिट्यान्स मुलुक बाहिर गएको छ । यो रकम भने गत आवको सोही अवधिको तुलनामा करिब सात प्रतिशतले बढी हो ।
गत आवको समिक्षा अवधिमा दुई अर्ब ५४ करोड रुपैयाँ रेमिट्यान्स बाहिरिएको नेपाल राष्ट्र बैंकको तथ्यांकले देखाएको छ ।
नेपालमा विश्वका विभिन्न मुलुकबाट रोजगारीका लागि आप्रवासी नागरिक आउने गरेका छन् । बिशेष गरी विदेशी लगानीमा सञ्चालनमा रहेका परियोजना, अन्तराष्ट्रिय स्तरका कम्पनी, जलविद्युत, गैर सरकारी संस्था लगायतका क्षेत्रमा विदेशी नागरिकलाई कामदारको रुपमा नियुक्त गरिन्छ ।
श्रम मन्त्रालयको तथ्यांक अनुसार नेपालमा आप्रवासी कामदारका रुपमा चिनियाँ नागरिक अधिक रहेका छन् । यद्यपी भारत, पाकिस्तान, श्रीलंका तथा बंगालदेश लगायतका मुलुकबाट पनि कामदार नेपाल भित्रने गरेका छन् । तर, यस्ता नागरिकको भने कहि कतै रेकर्ड हुँदैन । तसर्थ यस्ता आप्रवासी कामदारले पठाएको रेमिट्यान्स पनि सरकारसँग रेकर्ड नहुने नेपाल राष्ट्र बैंकले जनाएको छ ।
चालु आवको सोही अवधिमा भने ४ खर्ब ८० अर्ब ५० करोड रुपैयाँ रेमिट्यान्स नेपाल भित्रिएको छ । गत आवको सोही अवधिमा भने तीन खर्ब ९० अर्ब ५१ करोड रुपैयाँ रेमिट्यान्स भित्रिएको केन्द्रिय बैंकको तथ्यांक छ ।
श्रम मन्त्रालयको तथ्यांक अनुसार करिब १० हजार विदेशी नागरिकले श्रम स्वीकृति लिएर नेपालमा रोजगार गरि रहेका छन् भने ४७ लाख नेपाली नागरिकले वैदेशिक रोजगारीका लागि श्रम स्वीकृति लिएका छन्।