युक्रेनमा आणविक हतियार प्रयोग नगर्न रुसलाई बाइडेनको चेतावनी
०२ असाेज, एजेन्सी । अमेरिकी राष्ट्रपति जो बाइडेनले आफ्ना रूसी समकक्षी भ्लादिमिर पुटिनलाई युक्रेनमा रासायनिक वा सामरिक आणविक हतियार प्रयोग नगर्न चेतावनी दिएका छन् । युक्रेनमा पछिल्लो दिनमा व्यहोरेको गम्भीर क्षतिपछि रुसले रासायनिक तथा आणविक हतियार प्रयोग गर्नु सक्नेबारे राष्ट्रपति बाइडेनलाई सोधिएको प्रश्नमा बाइडेनले त्यसो गर्नु रुसका लागि ठूलो गल्ती हुने बताएका हुन् ।
यसै महिना युक्रेनमा ठूलो क्षति बेहोरिरहेको रुसले रासायनिक वा सामरिक आणविक हतियारको सहारा लिने सम्भावनाबारे एक अन्तर्वार्ताकारले सोधेको प्रश्नको जवाफमा बाइडनले उक्त कुरा बताएका हुन् । बाइडेनले भने, “दोस्रो विश्वयुद्धपछिको जस्तो युद्धको स्वरूप परिवर्तन गर्नुहुनेछ ।” यदि युद्धमा थप विवेक गुमाएमा उनी (रूसी) हरू विश्वमा अस्वीकृत हुनेछन् ।
युक्रेनले पश्चिमी मुलुकबाट सहयोगका रुपमा प्राप्त भारी हतियारका भरमा रुसी सेनाको कब्जामा रहेका पूर्वका केही भूभाग युक्रेनले पुनः कब्जा गरेको छ । उता, रसियाको कब्जामा रहेको इज्युम शहरबाहिर एउटा सामूहिक चिहान फेला परेपछि मस्कोले पश्चिमा मुलुकहरूबाट नयाँ आक्रोशको सामना गरिरहेको छ । कीभका अधिकारीहरू भन्छन्, “निकालिएका प्रायः सबै शवहरूमा यातनाको सङ्केत देखिएको छ ।”
तर पुटिनले रुसको पश्चिमा झुकाव भएको छिमेकी विरुद्ध आफ्नो युद्ध योजनाअनुसार नै अघि बढिरहेको बताउँदै आएका छन् । पुटिनले शुक्रबार भने, “यो योजना यही अवस्थामा रोकिने स्थिति छैन ।” उनले भने, “डोनबासमा हाम्रो आक्रामक अभियान पनि रोकिएको छैन । तर त्यो केही सुस्त गतिमा चलिराखेको छ । रुसी सेनाले नयाँ र नयाँ भूभाग कब्जा गरिरहेको छ ।”