सकियो ‘ए’ डिभिजन लिग
च्याम्पियन मछिन्द्र क्लब अपराजित, मनाङलाई रोक्दै आर्मी लिगको उपविजेता
१५ फागुन, काठमाडौं । मच्छिन्द्र क्लब अपराजित रहँदै सहिद स्मारक ‘ए’ डिभिजन लिग च्याम्पियन बनेको छ । दुई खेलअघि नै उपाधि पक्का गरेको मच्छिन्द्रले शनिबार भएको लिगको अन्तिम खेलमा सशस्त्र प्रहरीको एपीएफ क्लबलाई २–१ ले हरायो । मच्छिन्द्र क्लब नेपालको लिग फुटबलको इतिहासमा अपराजित रहेर लिग जित्ने पाँचौं टोली बन्यो ।
यसअघि एनआरटी, थ्रीस्टार, मनाङ मर्स्याङ्दी र नेपाल पुलिस क्लबले अपराजित रहेर लिग जितेका थिए । शनिबार त्रिपुरेश्वरस्थित दशरथ रंगशालामा भएको खेलमा मच्छिन्द्रका लागि कार्यबाहक कप्तान अभिषेक गुरुङ र रेजिन सुब्बाले एक एक गोल गरे । एपीएफका लागि प्रदीप लामाले बराबरी गोल फर्काए । यसपटक उपाधि जित्दा मछिन्द्रले लगातार ११ खेलमा कुनै गोल खाएन ।
शनिबार भएको अर्को खेलमा मनाङ मर्स्याङ्दी क्लबसंग १–१ गोलको बराबरी खेल्दै त्रिभुवन आर्मी क्लब दोस्रो स्थानमा लिग सकाउन सफल बन्यो । यस्तै एनआरटी नेपाल पुलिस क्लबलाई ३–१ ले हराएर तेस्रो भयो । मच्छिन्द्रका विशाल श्रेष्ठ, विशाल राई र कप्तान सुजल श्रेष्ठ लगातार ४ पटक ए डिभिजन लिग जित्ने खेलाडी बनेका छन् ।