हुम्लाका भारी हिमपात : जनजीवन कष्टकर, हवाइ उडान प्रभावित
१४ पुस, काठमाडौं । हुम्लामा भारी हिमपात हुँदा जनजीवन कष्टकर बनेको छ । चिसोसँग बढेसँगै भारी हिमपात हुँदा हिमाली जिल्लाको जनजीवन कष्टकर बनेको हो ।
हुम्ला सदरमुकाम सिमकोटमा एकफिट भन्दा बढि हिउँ जमेको जिल्ला प्रशासन कार्यालय हुम्लाले जनाएको छ । हुम्लाका प्रमुख जिल्ला अधिकारी गणेश आचार्यले यस्तै उत्तरी भेग नाम्खा गाउँपालिकातर्फ तीनफिटभन्दा बढि हिउँ जमेको जानकारी दिए ।
‘‘नाम्खा गाउँपालिकाको न्यालु, नारा र यारी लेकमा तीनफिटभन्दा बढि हिउँ जमेको छ । आवतजावत गर्न सकिने अवस्था छैन् । सिमकोट विमानस्थलमा रोकिएका विमानको केही भाग पनि हिउँले छोपिएको छ,” प्रजिअ आचार्यले भने ।
अहिले हुम्लाको तापक्रम माइनस ५ डिग्रीदेखि ८ डिग्रीसम्म पुगेको जनाइएको छ । यस्तै जुम्ला, मुगु, डोल्पा लगायतका जिल्लाहरुमा पनि भारी हिमपात भएको छ ।
यस्तै समयमै हिमपात हुँदा किसानहरुले समयमै बाली लगाउन पाउने सर्केगाड गाउँपालिकाका १ का वडाध्यक्ष गोकुल बुढाले जानकारी दिए ।
‘‘हिउँदे जेठासी बाली गहुँ, जौँ, उवा रोप्ने समय भएको बेलामा हिमपात भयो । अब हिमपात रोकिएर हिउँ पग्लने वित्तिकै यहाँका किसानलाई हिउँदे बाली लगाउने चटारो सुरु हुन्छ । समयमै हिमपात हुँदा हिउँदे बालीको उत्पादन बढ्छ्,” उनले भने ।
समयमै हिमपात हुँदा स्याउको उत्पादन बढ्ने र बेर्ना सार्ने समय हुने वडाध्यक्ष बुढाले बताए । खोलानालाहरुमा बरफ जम्न थालेको छ ।