इरान युद्धमा जुलाईयता मात्र अमेरिकी सेनाका ४ सदस्य मारिए, २०७ जना घाइते

१२ साउन, काठमाडाैँ । संयुक्त राज्य अमेरिकाको रक्षा मन्त्रालय (पेन्टागन) का अनुसार जुलाईमा इरानविरुद्ध पुनः सैन्य कारबाही सुरु भएयता चार अमेरिकी सैनिकको मृत्यु भएको छ भने २०७ जना घाइते भएका छन्।

पेन्टागनले अद्यावधिक गरेको ‘डिफेन्स क्याजुअल्टी एनालाइसिस सिस्टम’का अनुसार जुलाई २५ सम्म इरानविरुद्ध सञ्चालन गरिएको अमेरिकी सैन्य अभियान ‘एपिक फ्युरी’का क्रममा १४ अमेरिकी सैनिकको मृत्यु भएको र ४१७ जना घाइते भएका छन्।

पेन्टागनले हालै उक्त तथ्यांक प्रणालीमा ‘ओभरसिज अपरेसन्स’ नामक नयाँ श्रेणी थपेको छ। यसमा जुलाई ७ यताका अमेरिकी सैन्य हताहतीलाई छुट्टै राखिएको छ, जसअनुसार चार सैनिकको मृत्यु र २०७ जना घाइते भएका छन्।

यद्यपि, नयाँ श्रेणीमा मृतक सैनिकको नाम मात्र समावेश गरिएको छ। उनीहरूको मृत्यु वा सैनिक घाइते भएको समय, स्थान र कारणबारे विस्तृत विवरण भने दिइएको छैन।

इरानसँगको द्वन्द्वको नयाँ चरणमा चारै सैनिकको मृत्यु भएको पुष्टि भए पनि घाइते भएका सबै सैनिक इरानसँगको द्वन्द्वसँग सम्बन्धित छन् वा छैनन् भन्नेबारे पेन्टागनले स्पष्ट पारेको छैन।

अमेरिकी कानुनअनुसार कंग्रेस (संसद्) को अनुमति बिना राष्ट्रपतिले सामान्यतया अमेरिकी सेनालाई ६० दिनभन्दा बढी समयसम्म शत्रुतापूर्ण कारबाहीमा संलग्न गराउन पाउँदैनन्।

सञ्चारमाध्यमका अनुसार ट्रम्प प्रशासनले जुलाई १० मा कंग्रेसलाई पठाएको पत्रमा जुलाई ७ मा ‘स्ट्रेट अफ हर्मुज’हुँदै गइरहेका तीन व्यापारिक पानीजहाजमा इरानले गरेको आक्रमणले यसअघिको युद्धविराम सम्झौताको उल्लंघन गरेको जनाएको थियो।

यसै आधारमा ह्वाइट हाउसले जुलाई ७ लाई इरानसँगको शत्रुतापूर्ण कारबाहीको नयाँ चरण सुरु भएको मिति मानेको जनाइएको छ।