Advertisement
१९ फागुन, काठमाडौं । अबदेखि ट्रेकिङमा जाँदा विदेशी पर्यटकहरूले अनिवार्य रूपमा गाइड साथमा राख्नुपर्ने भएको छ । बिहीबार बसेको नेपाल पर्यटन बोर्डको बैठकले नेपालको कुनै पनि गन्तव्यमा ट्रेकिङ जाँदा विदेशी पर्यटकले अनिवार्य गाइड लैजानुपर्ने व्यवस्था गरेको हो ।
नयाँ व्यवस्था आगामी अप्रिल १ बाट लागु हुने बोर्डका निर्देशक मणिराज लामिछानेले जानकारी दिए ।
अहिले फ्री इन्डिभिजुअल ट्रेकर (एफआईटी) प्रणाली कार्यान्वयनमा छ । एफआईटी टिप्स कार्ड बिक्रीको अनुमति पाएका निकायबाट टिप्स कार्ड लिएर पर्यटकहरू एक्लै भ्रमणमा जाने गरेका थिए ।
अहिले एफआईटी र सामूहिक रूपमा लिने टिप्स कार्डको मूल्य फरक छ । एक्लै भ्रमणमा जानेहरूले दुई हजार र सामूहिक भ्रमण जानेहरूले एक हजार रुपैयाँ तिर्नुपर्छ ।
बोर्डले एफआईटी प्रणाली बन्द गरेसँगै अब विदेशी पर्यटकले टिप्स कार्ड लिँदा दुई हजार रुपैयाँ तिुर्नपर्ने छ ।
पर्यटक र गन्तव्य सुरक्षित हुने अपेक्षा
एफआईटी प्रणालीले गर्दा पर्यटकको गन्तव्य पक्का नहुने र हराउने समस्या थियो । त्यसले गर्दा गन्तव्य असुरक्षित हुने अवस्था थियो ।
“टिप्स एक ठाउँको लिने र अर्काे ठाउँमा गएर बस्ने गरेको भेटियो । जसले गर्दा गन्तव्य असुरक्षित हुने समस्या आएको थियो,” बोर्ड निर्देशक लामिछाने भने ।
पर्यटकहरूको गन्तव्य र सुरक्षामासमेत बारम्बार प्रश्न उठ्ने गरेको थियो । यस प्रकारको समस्या समाधानका लागि एफआईटी प्रणालीमार्फत टिप्स लिने व्यवस्था बन्द गरेको निर्दशक लामिछानेले बताए ।
“एफआईटी प्रणालीले गर्दा पर्यटकहरू हराउने र कतिवय अवस्थामा मृत्यु भेटिने अवस्था थियो । जसले गर्दा पर्यटक र उनीहरूको सुरक्षामा प्रश्न उठ्यो,” निर्देशक लामिछानेले भने, “नयाँ व्यवस्था लागु भएपछि सुरक्षा र गन्तव्यमा समेत सुधार हुने अपेक्षा गरेर यस्तो निर्णय गरेका हौँ ।”
Comments
