१९ कात्तिक, काठमाडौँ । युक्रेनका राष्ट्रपति भोलोदिमिर जेलेन्स्कीले अमेरिकाकी प्रथम महिला अर्थात् राष्ट्रपति डोनाल्ड ट्रम्पकी पत्नी मेलानिया ट्रम्पलाई देशको सर्वोच्च महिला सम्मान प्रदान गरेका छन्।
राष्ट्रपति जेलेन्स्कीको आदेशअनुसार युक्रेनले मेलानिया ट्रम्पलाई ‘युक्रेनमा मानवीय सहायता पुर्याउन गरेको महत्त्वपूर्ण व्यक्तिगत योगदान’का लागि ‘अर्डर अफ प्रिन्सेस ओल्गा’ प्रथम श्रेणीको सम्मान दिएको हो।
यो कुरा युक्रेनको दक्षिणी क्षेत्र खेरसनमा युद्धविराम समाप्त भएपछि सार्वजनिक भएको हो। जुन युद्धविरामका क्रममा रुसले कब्जा गरेको ओलेस्की सहरबाट सयौँ मानिसलाई बाहिर निकालिएको थियो।
मेलानिया ट्रम्पको निमन्त्रणामा रुस र युक्रेनका प्रतिनिधिमण्डल बिहीबार ह्वाइट हाउसमा भेट्ने कार्यक्रम छ।
जुन प्रतिनिधिमण्डलमा ती मानिसलाई सुरक्षित निकाल्ने काममा सहभागी सदस्यहरू समावेश हुनेछन्। बैठकमा दुवै देशका वरिष्ठ अधिकारी पनि उपस्थित हुनेछन्।
ह्वाइट हाउसले मेलानिया ट्रम्पले ‘द्वन्द्वमा संलग्न दुई देशबिच स्वतन्त्र रूपमा वार्ता सुरु गरेको र सफलतापूर्वक युद्धविरामलाई सहजीकरण गरेको’ बताएको छ।
ह्वाइट हाउसले अगाडि भनेको छ, ‘यो उपलब्धि अमेरिकाकी प्रथम महिलाको उल्लेखनीय कूटनीतिक पहल हो।’
रुस र युक्रेन दुवैले युद्धविरामका लागि मध्यस्थता गरेकामा मेलानिया ट्रम्पलाई बारम्बार धन्यवाद दिएका छन्। यद्यपि दुवैले आफ्नो भूमिकाको प्रकृति वा क्षेत्रबारे विस्तृत रूपमा बताएका छैनन्।
+ There are no comments
Add yours