कलमेगी चक्रवातको सन्त्रास : भियतनाममा बाढीले ४० को मृत्यु

१८ कार्तिक, काठमाडौँ । मध्य भियतनाममा गत हप्ता अघि आएको भारी वर्षा र बाढीका कारण मृत्यु हुनेको संख्या ४० पुगेको छ। यस घटनाले ७६ जना घाइते भएका छन्। जानकारी अनुसार केही मानिस बेपत्ता छन्।

अधिकारीहरूका अनुसार यो क्षेत्रमा अर्को शक्तिशाली आँधीले पनि असर पार्ने पूर्वानुमान गरिएको छ। भारी वर्षाले सडक नहरमा बदलिदिएका छन् भने नदीका किनारहरू फुटेर केही ऐतिहासिक स्थलहरू डुबानमा परेका छन्। २४ घण्टामा १.७ मिटरसम्म वर्षा हुँदा राष्ट्रिय रेकर्ड नै तोडिएको थियो।

पर्यावरण मन्त्रालयअन्तर्गत विपद् व्यवस्थापन संस्थाका अनुसार ह्यु, दा नाङ, लाम डोङ र क्वाङ त्रि प्रान्तहरूमा बाढीले छ जनाको ज्यान लिएको छ। राष्ट्रिय मौसम विभागका अनुसार टाइफुन कलमेगी शुक्रबार बिहान अवतरण हुने र त्यसअघि निरन्तर मौसमी क्रियाकलाप जारी रहने अनुमान छ। यसले दक्षिण चीन सागर हुँदै भियतनामको केन्द्रीय तटमा प्रहार गर्न सक्छ, जसमा हावाको गति १६६ किलोमिटर प्रतिघण्टासम्म पुग्न सक्ने जनाइएको छ।

भियतनाममा सामान्यतया जुनदेखि सेप्टेम्बरसम्म भारी वर्षा हुने गर्दछ। तर वैज्ञानिकहरूका अनुसार मानवजन्य जलवायु परिवर्तनका कारण मौसम घटनाहरू बारम्बार विनाशकारी बन्दै गएका छन्। यस वर्ष दसवटा टाइफुन वा उष्णकटिबन्धीय आँधीहरूले भियतनामलाई कुनै न कुनै रूपमा प्रभावित गरेका छन्, जसमा रागासा, बुअलोई र माटमो जस्ता आँधीहरूले ८५ भन्दा बढीको ज्यान लिएका थिए।

यसअघि कलमेगी चक्रवातले फिलिपिन्समा प्रहार गर्दा कम्तीमा दुई जनाको ज्यान गएको थियो भने सयौं हजार मानिसहरू विस्थापित भएका थिए। फिलिपिन्समा हजारौं विद्यालयहरू बन्द भएका छन्, व्यापक उद्धार अभियान चलिरहेको छ।

विपद् व्यवस्थापन संस्थाका अनुसार लगभग ८० हजार घरहरू अझै पनि डुबानमा छन्। १० हजार हेक्टरभन्दा बढी बाली नष्ट भएको छ। साथै, ६८ हजारभन्दा बढी पशुधनको मृत्यु भएको छ। अधिकारीहरूले खाद्यान्न, स्वच्छ पानी, औषधि र आश्रयको व्यवस्था गर्दै सडक तथा बिजुली पुनर्स्थापना कार्यलाई तीव्रता दिइरहेका छन्। एजेन्सी