इरानद्वारा नयाँ मिसाइल विकासको घोषणा, इजरायलसँगको सम्भावित युद्धका लागि तयार रहेको भनाइ

०५ भदाै, काठमाडौं । इरानले हालैको १२ दिने युद्धमा प्रयोग गरिएकाभन्दा बढी क्षमताका मिसाइलहरू विकास गरेको घोषणा गर्दै इजरायलले फेरि आक्रमण गरे नयाँ मिसाइल तैनाथ गर्ने चेतावनी दिएको छ।

इरानी रक्षामन्त्री अजिज नासिरजादेहले सरकारी समाचार एजेन्सी इरनासँग कुरा गर्दै भने, “हामीसँग अघिल्ला मिसाइलहरू भन्दा धेरै क्षमतायुक्त मिसाइलहरू छन्, र यदि यहुदीवादी दुश्मनले फेरि आक्रमण सुरु गर्‍यो भने हामी निश्चय तिनलाई प्रयोग गर्नेछौँ।”

मध्य जुनमा इजरायलले इरानविरुद्ध बम आक्रमण अभियान सुरु गरेपछि युद्ध चर्किएको थियो, जसको जवाफमा इरानले मिसाइल र ड्रोन आक्रमण गरेको थियो। यस युद्धविरामका बाबजुद इरानले आफू युद्धका लागि तयार रहेको स्पष्ट पारेको छ। इरानका प्रथम उपराष्ट्रपति मोहम्मद रेजा आरेफले पनि इरान ‘टकरावका लागि हरेक क्षण तयार’ रहनुपर्ने बताएका छन्।

पश्चिमी राष्ट्रहरूले इरानको क्षेप्यास्त्र कार्यक्रमलाई क्षेत्रीय सुरक्षाका लागि खतरा मान्दै आएका छन्, तर इरानले भने यसलाई आफ्नो रक्षा अधिकारको हिस्सा बताउँदै वार्ताको विषय बनाउन अस्वीकार गर्दै आएको छ। इरानी सञ्चारमाध्यमका अनुसार, सेनाले बिहीबार दुई दिने सैन्य अभ्यास सुरु गर्नेछ, जसमा छोटो र मध्यम दूरीका क्रुज मिसाइलहरूको परीक्षण गरिनेछ।