राप्रपाले निषेधित क्षेत्र तोड्न खोज्दा भद्रकालीमा झडप, प्रहरीले हान्यो पानीको फोहोरा
२७ चैत, काठमाडौँ । राप्रपाको प्रदर्शनमा प्रदर्शनकारीले निषेधित क्षेत्र तोड्न खोज्दा प्रहरी र प्रदर्शनकारीबिच झडप भएको छ । काठमाडौँको भद्रकालीबाट प्रदर्शनकारी सिंहदरबारतर्फ अघि बढ्न खोज्दा झडप भएको हो ।
प्रदर्शनकारी निषेधित क्षेत्रभित्र प्रवेश गर्न खोजेपछि प्रहरीले नियन्त्रण गर्न बल प्रयोग गरेको जनाएको छ । त्यसक्रममा प्रहरीले प्रदर्शनकारीलाई तितरबितर पार्न अश्रुग्याँस र पानीको फोहोरा प्रहार गरेको छ ।
प्रदर्शनमा सहभागीहरूले ‘राजावादी अघि बढ्यो’, ‘राजतन्त्र जिन्दावाद’ लगायतका नारा लगाएका थिए ।
प्रदर्शनकारीहरूले ढुङ्गामुढासमेत गरेका थिए । त्यसक्रममा केही घाइते भएका छन् ।
निषेधित क्षेत्र तोड्न खोजेपछि प्रहरी र प्रदर्शनमा सहभागी राप्रपासमर्थितहरूबीच झडपसमेत भएको थियो । त्यहीक्रममा प्रहरीले पानीको फोहोरा हानेको हो ।
गत फागुन ९ गते राप्रपाले सरकारसँग ४० बुँदे माग राखेको थियो । उक्त मागबारे सरकार उदासीन देखिएको भन्दै राप्रपाले जनप्रदर्शन गरेको हो ।