आज पृथ्वीजयन्ती, राप्रपाले चियापान गर्दै
२७ पुस, काठमाडौं । तत्कालिन राजा पृथ्वीनारयाण शाहले नेपाल एकताको शुरुवात गरेको स्मरणमा आज पुस २७ गते पृथ्वीजयन्ती जयन्ती मनाइँदैछ । सरकारले आज सार्वजनिक विदा दिएको छ । राष्ट्रिय प्रजातन्त्र पार्टी (राप्रपा) ले आज पृथ्वीजयन्तीको अवसरमा चियापान कार्यक्रमको आयोजना गरेको छ ।
राप्रपाका अध्यक्ष तथा सांसद राजेन्द्र लिङ्देनले चियापानका लागि राजनीतिक दलका नेता तथा सांसदहरुलाई चियापान कार्यक्रमका लागि आमन्त्रण गरेका छन् । हिजो बसेको प्रतिनिधिसभा बैठकमा धारणा राख्दै अध्यक्ष लिङ्देनले रोष्टमबाटै चियापानका लागि आग्रह गरेका थिए । त्यसैगरी सो पार्टीले चियापानमा सहभागीताका लागि पार्टीको तर्फबाट औपचारिक रुपमा निमन्त्रणा समेत पठाएको छ ।
तत्कालिन राजा पृथ्वीनारायण शाहले तीन सय वर्ष अघि बाइसे चौविसे राज्यलाई एकताको सूत्रमा कायम गर्ने आधुनिक नेपालको खाका कोरेका थिए । पुस २७ गते नै सो कामको शुरुवात गरेकाले त्यसको सम्झनामा यो जयन्ती मनाउने प्रचलन छ । देशमा गणतन्त्र आएपछि पृथ्वीजयन्ती मनाउन छाडिएको थियो । सरकारले सार्वजकि विदा पनि कटौती गरेको थियो । तर यस वर्ष सत्ता साझेदार दल राप्रपाको विशेष आग्रहमा सरकारले आज सार्वजनिक विदा दिएको हो ।
पृथ्वीजयन्तीको अवसरमा सरकारले दिएको सार्वजनिक विदाको नेपाल आदिबासी जनजाति महासंघले विरोध जनाएको छ । पृथ्वीनारायण शाह एकताको प्रतीक नभइ आदिबासी जनजातिमाथि शोषण गरेको र सामन्ती राजाको जन्मजयन्ती अहिलेको गणतान्त्रात्मक शासन प्रणालीमा मनाउनु गलत भएको महासंघले भनेको छ ।