महाकाली: छानविन गर्न सरकारले बनायो पाँच सदस्यीय समिति, १० दिनभित्र प्रतिवेदन पेश गर्नुपर्ने
१७ साउन, काठमाडौँ । तुइनबाट महाकाली नदी तर्ने क्रममा खसेर वेपत्ता भएका दार्चुलाका जयसिंह धामीको घटना छानविनका लागि गृह मन्त्रालयले पाँच सदस्यीय छानविन समिति गठन गरेको छ । आइतबार गृहमन्त्री बालकृष्ण खाणले गृह मन्त्रालयका सहसचिव जनार्दन गौतमको संयोजकत्वमा पाँच सदस्यीय समिति गठन गरेका हुन् ।
छानविन समितिमा नेपाल प्रहरीका प्रहरी नायब महानिरीक्षक पुरुषोत्तम कंडेल, राष्ट्रिय अनुसन्धान विभागका अनुसन्धान निर्देशन हुतराज थापा, सशस्त्र प्रहरी बलका सशस्त्र प्रहरी बरिष्ठ उपरीक्षक सुरेश कुमार श्रेष्ठ र जिल्ला प्रशासन कार्यालय दार्चुलाका सहायक जिल्ला अधिकारी ज्योत्स्ना भट्ट सदस्य छन् ।
यस समितिले उक्त घटनाको छानविन गरी सत्यतथ्य सहित १० दिनभित्र प्रतिवेदन पेश गर्नुपर्ने छ । यसअघि नेकपा एमाले, माओवादी केन्द्र लगायत पार्टीले दार्चुलाको घटना छानविन गर्न माग गरेका थिए । स्थानीयहरुले भारतीय सीमा सुरक्षा बलको लापरवाहीका कारण जयसिंह धामी महाकालीमा खसेर वेपत्ता भएको आरोप लगाउँदैआएका छन् ।
भारतीय प्रशासनले भने पत्र पठाएर यस घटनामा भारतीय पक्षको कुनै संलग्नता नरहेको बताएको छ । दार्चुलास्थित जिल्ला प्रशासन कार्यालयका अधिकारीहरुले पनि यस घटनाको छानविन नगरिकन यकिन भन्न नसकिने प्रतिक्रिया दिएका छन् ।
यसैबीच गृहमन्त्री बालकृष्ण खाणले देशभर संचालनमा रहेका तुइन हटाउन निर्देशन दिएका छन् । गृह मन्त्रालयमा बसेको विपद् व्यवस्थापन समितिको बैठकमा गृहमन्त्री खाणले देशभर तुइन भएका स्थानमा तुइन हटाएर झोलुङ्गे पुल निर्माणको कामलाई तिब्र बनाउन उनले निर्देशन दिएका हुन् ।