१० खेलाडीमा सिमित नेपाल ३–० गोलले पराजित
२९ जेठ, काठमाडौं । नेपाली राष्ट्रिय फुटबल टोलीका प्रशिक्षक अब्दुल्लाह अलमुताइरीले अष्ट्रेलियाविरुद्ध नेपाली टोलीको प्रदर्शनको प्रशंसा गर्दै खुसी रहेको बताए । १० खेलाडीमा सिमित नेपाल अस्ट्रेलियाविरुद्ध ३–० गोलले पराजित भएको छ । पहिलो हाफमा दुई गोल गरेको अस्ट्रेलियाले दोस्रो हाफमा थप एक गोल गर्यो ।
अलमुताइरीले अष्ट्रेलियाजस्तो बलियो टोलीविरुद्ध खेलाडीले गरेको मिहिनेतको प्रशंसा गरे । ‘धन्यवाद मेरो खेलाडीहरुलाई । उनीहरु मेरो हिरोहरु हुन् । आजको खेल निकै कठिन थियो,’ उनले भने, ‘पहिलो हाफको सुरुवातमा नै गोल खान पुग्यौं, र दोस्रो हाफमा १० खेलाडीमा समेटिन पुग्यौं । तर खेलाडीहरुले आफ्नो मिहिनेत कम हुन दिएनन् र म यसमा खुसी छु ।’
म्याथ्यु लेकीले खेलको छैटौँ मिनेटमा नै अस्ट्रेलियालाई अग्रता दिलाएका थिए । ३८ औँ मिनेटमा फ्रान कारासिकले अग्रता दोब्बर बनाए । पहिलो हाफको अन्त्यतिर रोहित चन्दले रातो कार्ड पाएपछि नेपाल १० खेलाडीमा सिमित बनेको थियो ।
दोस्रो हाफमा ५७ औँ मिनेटमा मार्टिन बोयलले अर्को गोल थपे । त्यसपछि पनि अस्ट्रेलियाले गोलका थुप्रै अवसर सिर्जना गरे पनि गोल भने गर्नबाट चुक्यो। खेलमा अस्ट्रेलिया नेपालमाथि हाबी बनेको थियो । नेपालले विपक्षीको पोष्टमा एउटा पनि हमला गर्न सकेन ।
हारसँगै समूहमा दुई खेल जित्दै ६ अंक बटुलेर नेपाल पुछारबाट दोस्रोमा सिमित बनेको छ ।