Advertisement
१५ चैत्त, नयाँदिल्ली । भारतमा कोरोनाभाइरसको दोस्रो लहरको प्रकोप नियन्त्रणबाहिर जान थालेको छ । पछिल्लो चौबीस घण्टामा भारतमा करिब ६३ हजार जनामा कोरोना संक्रमणको पुष्टि भएको छ ।
भारतमा शुक्रबार एकैदिन ६२ हजार ७१४ जना सङ्क्रमित भेटिएका छन् । उक्त अवधिमै २८ हजार ७३९ जना मात्रै सङ्क्रमणमुक्त भएका छन् ।
संक्रमणमुक्त हुनेको संख्या संक्रमित हुनेभन्दा अत्यन्तै थोरै भएपछि सक्रिय संक्रमितको संख्या बढ्दै गएको छ ।
भारतको केन्द्रीय स्वास्थ्य तथा परिवार कल्याण मन्त्रालयले पछिल्लो २४ घण्टामा भारतमा ३१२ जनाको कोरोनाभाइरस सङ्क्रमणका कारण मृत्यु भएको जनाएको छ ।
भारतमा अहिलेसम्म कोरोनाभाइरसबाट कुल एक करोड १९ लाख ७१ हजार ६३४ जना सङ्क्रमित भएको मन्त्रालयले जनाएको छ ।
एक करोड १३ लाख २३ हजार ७६२ जना सङ्क्रमणमुक्त भइसकेको मन्त्रालयले उल्लेख गरेको छ ।
भारतमा अहिले पनि सङ्क्रमित अवस्थामै रहेकाहरुको सङ्ख्या भने चार लाख ८६ हजार ३१० रहेको छ ।
मन्त्रालयका अनुसार भारतमा कोरोनाभाइरसबाट मृत्यु भएकाहरुको कुल सङ्ख्या एक लाख ६१ हजार ५५२ पुगेको छ ।
भारतमा कुल छ करोड दुई लाख ६९ हजार ७८२ जनालाई कोरोनाविरुद्धको खोप लगाइएको छ ।
Comments
