अमेरिका-इरानबीच आक्रमण रोक्ने सहमति, वार्ता जारी राख्ने निर्णय

१५ असार, काठमाडौँ । अमेरिका र इरानबीच एकअर्कामाथिको आक्रमण रोक्ने सहमति भएको छ । मध्यपूर्वमा जारी तनाव अन्त्य गर्ने उद्देश्यसहित वार्तालाई निरन्तरता दिने सहमति भएको एक अमेरिकी अधिकारीले जानकारी दिएका छन् ।

अधिकारीका अनुसार पछिल्ला दिनमा दुवै देशका सेनाबीच आक्रमण–प्रत्याक्रमण भए पनि अब तत्कालका लागि सैन्य कारबाही रोक्ने समझदारी बनेको छ । साथै समुद्री मार्गमार्फत हुने जहाज आवतजावतलाई सहज बनाउने सहमति पनि भएको जनाइएको छ ।

जुन १७ मा भएको संवेदनशील समझदारीपत्रपछि पनि दुवै पक्षबीच आक्रमण जारी रहेपछि मध्यपूर्वको तनाव झनै बढेको थियो । विशेषगरी हर्मुज जलडमरु क्षेत्रमा ढुवानी प्रभावित भएको बताइएको छ ।

समझदारीअनुसार इरानले व्यावसायिक जहाजलाई जलडमरुमार्फत सुरक्षित आवतजावत गर्न दिने र अमेरिकाले इरानी बन्दरगाहमाथिको अवरोध हटाउने सहमति भएको उल्लेख छ ।

“सबै प्राविधिक विषयमा वार्ता जारी रहनेछ, हालका लागि दुवै पक्षले आक्रमण रोकेका छन्,” एक अमेरिकी अधिकारीले भनेका छन् ।

अमेरिकी सञ्चारमाध्यमका अनुसार वार्ता मंगलबार कतारको दोहामा पुनः सुरु हुने सम्भावना छ । तर औपचारिक स्थान र समयबारे दुवै पक्षले स्पष्ट जानकारी दिएका छैनन् ।

यसैबीच, अमेरिकी राष्ट्रपति डोनाल्ड ट्रम्पले इरानले आक्रमण जारी राखे सैन्य कारबाही पुनः सुरु हुन सक्ने चेतावनी दिएका छन् । उनले आवश्यक परे इरान “अस्तित्वमै नरहने” स्थिति आउन सक्ने बताएका छन् ।

यसअघि पाकिस्तानको मध्यस्थतामा भएको युद्ध अन्त्यसम्बन्धी समझदारीपछि पनि दुवै पक्षले एकअर्कालाई सहमति उल्लङ्घन गरेको आरोप लगाउँदै आक्रमण गरेका थिए ।

पछिल्लो झडपमा अमेरिकी सेनाले इरानका १० वटा सैन्य लक्ष्यमा आक्रमण गरेको दाबी गरेको छ भने इरानले कुवेत र बहराइनस्थित अमेरिकी सैन्य शिविरमा आक्रमण गरेको जनाएको छ ।