देशभर बदली, यी प्रदेशमा भारी वर्षाको सम्भावना

१७ असाेज, काठमाडौँ । देशभर मनसुनी वायु र स्थानीय वायुको प्रभावले गर्दा मौसममा उल्लेखनीय परिवर्तन आएको छ । मौसम पूर्वानुमान महाशाखाका अनुसार आज (शुक्रबार) दिउँसो देशभर सामान्यतया बदली रहनेछ भने देशका विभिन्न भागमा वर्षाको सम्भावना रहेको छ ।

विशेषगरी, कोशी प्रदेश, बागमती प्रदेश, गण्डकी प्रदेश र लुम्बिनी प्रदेशका पहाडी तथा तराईका केही भू-भागहरूमा र मधेश प्रदेश लगायत देशका अन्य प्रदेशका पहाडी तथा तराई भू-भागका थोरै स्थानहरूमा मध्यम वर्षाको सम्भावना रहेको छ । यसैगरी, लुम्बिनी प्रदेशको तराई, कर्णाली प्रदेश र बागमती प्रदेशको पहाडी भू-भागका एक-दुई स्थानमा भारी वर्षाको समेत सम्भावना रहेको महाशाखाले जनाएको छ ।

आज राति पनि देशभर सामान्यतया बदली रहनेछ । कोशी प्रदेश, गण्डकी प्रदेश र लुम्बिनी प्रदेशका पहाडी तथा तराई भू-भाग र मधेश प्रदेशका केही स्थानहरूमा मध्यम वर्षाको सम्भावना छ । बाँकी प्रदेशका पहाडी तथा तराई भू-भागका थोरै स्थानहरूमा पनि वर्षा हुन सक्नेछ । कोशी प्रदेश, मधेश प्रदेश, बागमती प्रदेश, लुम्बिनी प्रदेश र गण्डकी प्रदेशका एक-दुई स्थानमा भारी वर्षाको सम्भावना रहेकाले सतर्क रहन आग्रह गरिएको छ ।

लगातारको वर्षाले पहाडी क्षेत्रमा पहिरो र तराईमा डुबानको जोखिम बढाउन सक्ने भएकाले सतर्कता अपनाउन महाशाखाले सबैलाई अनुरोध गरेको छ । नदी तथा खोलाको जलस्तर बढ्न सक्ने भएकाले नदी किनारका बासिन्दालाई विशेष सावधानी अपनाउन भनिएको छ । आगामी दिनमा पनि मौसममा यस्तै अवस्था रहने भएकाले यात्रा गर्दा वा बाहिर निस्कँदा मौसमसम्बन्धी जानकारी लिएर मात्र निस्कन उचित हुनेछ ।